Friday, September 09, 2005

خلى الشعب يعيييييييييش


عندما ساقتنى الظروف .. و بعد حوالى ساعة و شوية من البهدلة و اللف على اللجان الانتخابية اكتشفت اخيرا انى غير مسجل بالكشوف و انى مش هنتخب انهارده .. لما خرج عليا الصول و ندالى ..... فلان الفلانى....... و انا اردد كالابله .. افندم .. قالى بلهجة فلاحية مألوفه .. غير مقيد
مش عارف ليه حسيت زى الولية المطلقة كده او كانى مرمى على باب جامع لغاية مجه
واحد ابن حلال و خد بايدى لغاية لجنة الوافدين و قالى فيما معناه يا بنى انا حطيتك فى اول
الطريق و ربنا معاك .. مفهمتش الا ما بصيت للطابور الطويل اللى واقف فهمت لكن لانى مواطن صالح فالوقوف فى الطوابير من سماتى و كبرت بقى و هنتخب يعنى هنتخب و هقف
فى الطابور
المهم انى وقفت و لاننا مصريين فقد تحول الطابور لكتلة بشريه عجيبة لا يمنك وصفها الا
اذا مريت بالتجربة فالطابور كما ذكر فى مختار الصحاح اللى عمرى ما قريته هو ( كل واحد يبص لقفا اللى قدامه وواحد واحد والرجالة يمين و الستات شمال) .. وكل ما واحد يخلص دوره يتقدم الطابور خطوة اما الطابور كما يعرف فى العرف المصرى هو تلاحم
مجموعة بشريه فى اقل مكان ممكن بحيث يعتقد معظمهم انه واقف فى الاول و ان الدور عليه رغم انه لسه مشرف
المهم و لانى بقالى كتير ممريتش بتجربة الطابور فقد اندمجت مع الناس و ما هى الا لحظات و بدأنافى تبادل النكات و التعليقات الاذعة حول العملية الانتخابية
و كان لمبارك نصيب الاسد من التريئة البريئة .. و رغم اننا اخدنا راحتنا ع الاخر الا ان
الكل كان بيتهرب من اجابة السؤال المنطقى اللى هو انت هترشح مين ... و بدافع الفضول
فقط طلعت البرنامج الانتخابى بتاع ايمن نور و قعدت اقرا فيه فلقيت الناس عينها معايا قمت
قايل ايه هو مش كلكو ايمن نور
المهم غمز و لمز و ضحك و فى النهاية الكل اعلنها صريحة اه هنرشحه .. و هنا بدأت
العادة المصريه و بدأ الكل يتكلم فى نظرته السياسية و الطريف انى لقيت الناس مصدقه
نفسها و كل واحد بيتكلم كانه زعيم او كانه هيكل مثلا و كانه عاش طول عمره فى المعتقلات..... الحقيقة مقدرتش افسر الموضوع ده ......ناس طول عمرها خايفة من
السياسة و كل واحد بيحاول يقنع اللى واقف جنبه بعبقريته و نظرته السياسية
و بمناسبة الموضوع ده كان اطرف ما حدث ان تجرأ احدهم و اعلن وسط هذه الجنة التى
تميل بوضوح لايمن نور انه سيرشح مبارك و طبعا بدأ الكل فى توجيه الاتهامات و نعته بالعميل و الخائن - قال يعنى احنا مش بنايده بقالنا اربع دورات - المهم لحد ما واحد قام قايلهم سكوت يا جماعة الراجل حر يعبر عن رايه ما دام مقتنع به
لحد هنا و قلت يا سلااام عداك العيب لكن لحظة و عرفت انه من مرضى جنون السياسة
اللى انتشر فجاه ... و خدته الزعامة و قال ايه ؟؟؟ ... كل واحد يرشح اللى هو عايزه ... ارفع راسك يا اخى لقد مضى عهد الاستبداد
طبعا انا فطست من الضحك و قلتله مضى هو ايه اللى مضى ده بيبدأ .. و هوووب لقيت نفسى خاين و عميل .. لكن الحمد لله ان الموضوع مطولش
المهم حاولت افسر الموضوع ملقيتش غير انى بكلامى ده نزعت الاحلام الورديه عن الناس
البسيطة ديه عشان كده زعلوا
المهم يعدى الوقت و اوصل لاول الطابور - اخييييرا - و كان جنبى اول الطابور النسائى و قدامى العسكرى الغلبان اللى شكله طالع عينه يا عينى من سته الصبح و الساعة وقتها كانت تسعة بالليل .. المهم الراجل العسكرى واقف عادى بيحاول يمنع حد من الدخول فى غير دوره و طبعا محاولات فاشله و فجأه و بدون مقدمات اجد السيدة اللى جنبى تنظر للعسكرى باشمئزاز واضح و تقوله
اوعى تلمسنى ... متقربش منى .. انتو عايزين منى ايه ... انا هوديكو فى داهيه

و الرجل الغلبان اتخض و قالها يا مدام محدش كلمك انا بعيد عنك اهوه و كعادتى السخيفة
قلتلها يا مدام محدش قربلك و على فكرة محدش بيصور

يا نهار اسود للدرجة دى الناس اتجننت .. كله بقى بالحالة دى والله عال عال عال ... ده اكيد كبت بس و الله جميل ان ده موجود يمكن موجود بشكل كاريكاتورى و مدعى لكن هينضج و يتحول لوعى مش ادعاء .. و على ما ينضج ادينا قاعدين


7 comments:

Nour said...

والله مسخرة

أنا ضحكت بجد

بس مش عارفة أنا ليه محصليش -الحمد لله- كل اللي حصلك ده

مع إني من "العيال" بتوع 85 اللي طالعالهم توماتيكي توماتيكي

هو أنا عملت حركة إني قبل الإنتخابات ب 3 تيام رحت طلعت البطاقة الإنتخابية عشان كنت حاسة إن حوار الكشوفات ده مش هينفع و محدش هيبقى فاضيلي يومها

ياللا أهم حاجة الواحد يكون حاول بجد

و على رأيك أدينا قاعدين..

Ahmed Shokeir said...

يعنى الست ماحدش كلمها وعملت كده ....فعلا الناس أعصابها بايظه
إوع تكون يابيبو عملتها حاجه كده ولا كده ومش واخد بالك
المهم أنت ماقلتاناش عرفت تنتخب ولا قالولك فوت علينا بكرة

Haitham said...

ياراجل بقى تتعب نفسك وتروح الانتخابات ..وكمان تطلع برنامج نور ..غلطاتك كتير يابيبو خللى بالك شوية

Mr-Biboooo said...

انا مش عارف هل فعلا هناك بداية لتكون وعى سياسى لدى شعبنا الكريم و رغبة فى المشاركة و ظهور محترم للرأى العام و لا ديه موضة و عدت
وهتيجى حاجات تانية تشغلنا و ادى الدراسة داخلة و الناس هتنشغل فى عيالها و مصاريفهم و دروسهم


نور: انا بقى موت من الضحك خاصة لما سمعت الراجل واللى كان متحمس لايمن نور بيقول للراجل بتاع مبارك ارفع راسك يا اخى فقد مضى عهد الاستبداد و تسى انها كلمة عبد الناصر
و برضه ادينا قاعديييييييييييين

احمد: اخس عليك انا بتاع الحاجات ديه برده 0.. ثم الست متشجعش اساسا ... ما علينا
المهم انى انتخبت طبعا يعنى اتبهدل كل البهدلة دة و منتخبش

هيثم : قلة خبرة و قله عقل يا عم هيثم

Anonymous said...

يا عم بيبو ماحنا عارفين من الاول انت ايه الى خلاك تروح بس اما بالنسبة للزعامة فانا على اد ما بلوم على الحاكم على اد ما شعبك يتخاف منه برضه وحمى الزعامة متأصلة فينا
المهم بحل يقق جزء من كلامه مش كلامه كل علشان مبقاش طماع

Anonymous said...

Best regards from NY! Latest technique breakthrough &aposs in cosmetic surgery Izod oxford shirt mens humidifier safety cheap swimwear Analyze your credit report credit help fixmycreditsite.com Bikini swimwear thong Skoda kole rent a car

Anonymous said...

تنسيق كليات و معاهد الهندسة الخاصة 2013
كليات الهندسة الخاصة فى مصر بالمصاريف 2013
اسعار كليات و معاهد الهندسة الخاصة 2013
مصروفات الدراسة بالكليات و المعاهد الخاصة 2013
صور بيجامات صيفي حريمي 2013
صور فساتين زفاف للمحجبات 2013
صور فساتين زفاف 2013
صور فساتين سواريه 2013 , صور فساتين سهرة 2013
فساتين سواريه للمحجبات 2013 , فساتين سهرة للمحجبات 2013
صور كلاب 2013 , صور كلاب مفترسة 2013 , كلاب بوليسي 2013
مصروفات المعهد العالي للهندسة و التكنولوجيا بالبحيرة 2013
مصروفات المعهد العالي للهندسة و التكنولوجيا بدمياط الجديدة 2013
مصروفات معهد الدلتا العالي للهندسة و التكنولوجيا بالمنصورة 2013
مصروفات المعهد العالي للهندسة و التكنولوجيا بطموه الجيزة 2013
مصروفات معهد الاهرام العالي للهندسة و التكنولوجيا 2013
وصفات طبيعية لتبييض البشرة
مصاريف الجامعات و المعاهد الخاصة 2013