Thursday, July 14, 2005

يووووه ....انا زهقان بفعل فاعل


ما اسوأ النهر الخالى من الماء -------- حكمة فرعونية

لا اعلم لماذا اتذكر تلك الحكمة دائما عندما افكر فى اشياء كثيرة مثل المستقبل......الحب......النجاح ......او حتى عندما ابحث عن معانى لكلمات مثل الاستقرار و الطمأنينة و اهمية الحلم وضرورة الامل
حقا...
ما فائدة النهر الذى نسعى اليه و نأتيه لنجده خاليا من الماء ...اشعر بهذا الاحساس عندما ارى كم الاشياء التى تحولت الى هيكل أو اطار لشىء فارغ تماما...


ثم اعود لاعلق على نفسى - كعادتى - فأقول والله الفراعنة دول عفاريت مش بس قدروا يعرفو اسرار الطب والهندسة و التحنيط قبل الناس كلها لا كمان عرفوا الحالة اللى هتوصلها البلد بعد كل القرون و العصور ديه من العصر الفرعونى حتى العصر المباركى.
فلقد استطاع الفراعنة بتلك الحكمة المختصرة وصف الكثير من احوالنا مثل التعليم و الصحف القومية و الاعلام المحلى و ايضا اشياء مثل الحب و الحلم
فأنت تجد الحب اصبح هيكلا او ( نهر خالى) عليه لافته سمجه تقول لك ...ابقى قابلنى....
و الحلم فى خيال شاب ما تجده اطار فارغ عليه تعليق سخيف يقول لك بابتسامة لزجه..طار فى الهوا شاشى

و اشياء اخرى و اخرى...فالغضب السياسى تحول ايضا بفعل فاعل الى مجرد جعجعة و صوت عالى دون اى جدوى او رغبة حقيقيه و امتدت الهياكل و الانهار الخالية لتجعلك تسأل نفسك سؤالا منطقيا لماذا نتمسك بتلك الهياكل الكثيرة و نعتز بها (قوى كده) فما الحكمة وراء مجالس تشريعيه لقوانين يتم طبخها و ما فائدة دستور يتم تعديله ليلائم لون جزمة السيد الرئيس....بلاش...ليه نسنتكر العرى فى الكليبات و نرحب بيه و نسقفله فى الشارع و على الشواطىء و كمان نستخدمه فى الدعايه لبلدنا على الفضائيات تحت اسم السياحة

لكن ارجع و اقول ان كل ده مش مهم المهم هو الانسان نفسه ...انا مؤمن بكده... لكن المصيبة لما يتحول الانسان نفسه ده الى نهر خالى من الماء...مجرد اله تقوم باداء واجباتها اليومية بشكل روتينى و يكون التحول ده كمان بفعل فاعل و بتعليم معلم على مدار فترة تعليم طويلة
نهر بلا ماء او بمعنى اخر بلا لحظة تفكير بلا رغبة فى حلم حقيقى بلا ابداع بلا احساس....
و ..... فى (شطحة من شطحاتى ) تخيلت انى التقطت صورة للبلد كلها بشوارعها و حواريها و ناسها و أفكارها و احلامها و نبضاتها و كل حاجة فيها
لقيت نفسى ماسك صورة ماسخة ..مخوخة...مخرومة...فاضية ....صورة معمولة بفعل فاعل
ساعتها خفت....و حسيت بوحدة ولقيتنى مش عارف حتى استخبى فى الزحمة...........................................................................

10 comments:

Hany Mihanny said...

هايلا بجد
معلش علشان نفسي قصير النهارده

بنت مصرية said...

زهقان من حقك

بس والله لما أقرا كلم زى ده فى مدونات بيفضل عندى امل ان فى ناس محوشة من النهر شوية ميه لسه وممكن يرجعوا يملوا النهر تانى

ما اسوأ النهر الخالى من الماء ... حكمة أول مرة أقراها، شكرا

مدونتك رائعة:)

Guevara said...

ما زلت مبهور بكلامك يا بيبو ..يمكن عشان ما توقعتش انك تكتب بالإحساس ده .. لتاني مرة .. الله ينور

Mr-Biboooo said...

متشكرين....... واتمنى ان فعلا يكون النهر ليه منبع يا ترى انهو اهم اننا نكون محوشين شوية ميه و لا يكون للنهر منبع يطلع منه احلامنا

Anonymous said...

رائع بجد. إحساس عالى و خيال أعلى

Anonymous said...

انا عملت الخطوات اللى قولت عليها ويارب رسالتى تكون وصلتك انا محمود شهدى وحبيت اضيف سلامى واهدائى للعائله المالكه وبابا حابى وماما كلونارى يا بتاع ارشاد

Anonymous said...

عالعموم ياعم الحج مليان اهو بكرا ييجي اللي يفضيه
ولو فاضى برضه بكره ييجي اللي يملاه
وبرضه الفراعنه كانوا عرفين ان ده حيحصل وكالعاده كانوا عاملين حسابهم
بس الي انا عاوزوا منك توصلهم وتسالهم كانوا عاملين حسابهم ازالى علشان الحق اعمل حسابي انا كمانلى

Anonymous said...

Best regards from NY!
http://www.bontril-tablet.info/Wellbutrin-aniexty.html 21st century travel senior citizens and wheelchairs direct washington merchant bank account central Overdose long term affect antidepressant buy zyban Illegal antidepressants

Anonymous said...

و الله انا كتبت علي الجووودل انا زهقلن طلعتلي انت لكن و الله فيك بركه
اهه الواحد اطمن انه مش هو بس اللي زهقان دي طلعت البلد كلها زهقانه
و..............ايه الحل ......؟؟؟؟

Anonymous said...

I have been looking for sites like this for a long time. Thank you! cheap office phone system3122 Minidv dcr-hc32e http://www.buy-a-used-minivan-denver.info/Minivan-1992.html Chevrolet tahoe armrests Hummer 23