Friday, August 19, 2005

عازف القثارة ما بين الحياة و الموت


هل تتصور انه فى يوم من الايام يمكنك ان تدير قرص المذياع الخاص بك على محطة .... محطه ايه؟.... نجوم اف ام مثلا فتخرج اليك نغمات اغنية تبلغ من العمر ما يزيد عن خمس تلاف سنة !!!!!!!.... هذا الحلم راودنى و بعنف عندما قرأت كلمات تلك الاغنية الحزينة التى تغنى بها مطرب مصرى ايام اخوانا الفراعنة


اكيد مش عارف مناسبه الاغنيه بس ممكن تقل ليالى اضواء المعبد او حتى ليالى منف ايا كان فأنا حسيت الاغنيه قوى رغم انى مؤمن ان اختلاف اللغة يفقدك جزء كبير من الاحساس خاصة اننا بنتكلم هنا عن اغنيه يعنى مش بس افتقدنا الاحساس باللغة لكن كمان فقدنا اللحن و الاداء

لكن معلش تعالى نلعب لعبه عشان نعوض الفقدان ده يعنى بمعنى اخر تعالى نعيش الجو و نخش الموود عشان نستمتع بالاغنيه .... مش فاهم عمرك و انت بتسمع ام كلثوم ما تخيلت نفسك واحد من الناس المنشية اللى قاعده فى الصاله ... كده يعنى
خلاص يالا اخترلك اسم .. لأ رمسيس ايه مينفعش و لا تحتمس دول ملوك يابا .. بص هديك حبه اسماء نقى منها
اعح - حتب و تعنى القمر راضى
كا - رع و تعنى قرين الشمس
نفر - غرد و تعنى الصغير الجميل

اخترت يالا بقى البس !!!! ... لا مش قصدى والله قصدى البس دول .... يووووه قصدى اهوه عبايه كتان مزركشه ماشيه على احدث موضه لفرزاتشى هيليوبليس .... يالا تخيل شعرك زلبطة على موضه الكهنة او انتى يا ستى بقصة ايزيس المشهورة ... ايه متعرفيهاش ماليش دعوة انا مالى .... يالا يالا الحفله هتبدأ

اهوه هو ده المطرب ... ايوه اللى ماسك القيثارة ديه ارقى انواع الات الموسيقيه اليومين دول ... يالا نضف ودنك و اسمع و اتسلطن

ملحو ظة: اسمع كل كوبليه على حده متخنصرش و الربطهم ببعض ده هدف الاغنيه مش هغششك تانى


لا تزال بعض الاجيال تسير و دخل غيرها الى عالم الخلود من ازمنة موغلة فى القدم.... فلا احد يعود من وراء القبر فيخبرنا بما يحتاجون اليه هناك ... او ليريح قلوبنا حتى نذهب الى هناك ايضا حيث ذهبو ترالاملام


رحلت اجسام منذ اقدم العصور و يحل محلها جيل اخر
الشمس تولد فى الصباح و ترتاح عند مجىء الليل .. ينجب الرجال و تلد النساء و تتنفس جميع المخلوقات الحية الهواء ... تولد الاطفال فى وقتها المحدد ثم تذهب الى قبرها
لا يمكن اطالة الحياه و لا يوجد من لا يذهب للعالم الاخر و ليست فترة البقاء فى الدنيا الا بقدر فترة الحلم

اقضى يوما بهيجا .. تمتع بأجمل العطور رائحة و ضع اكاليل ازهار
اللوتس على اكتاف زوجتك و جيدها عسى ان يجلس بجوارك شخص تحبه
ليكن امامك غناء و موسيقى
اطرح الهموم بعيدا عنك و لا تفكر الا فى السرور حتى يأتيك وقتك الذى تذهب فيه الى ارض السكون ) ترالاالام

انتهى الحفل الساهر ايه رأيك بجد والله ... الله بتشتم ليه و الله الاغنيه جميله طب اقراها تانى كده دى عبقريه وصفت علاقة الانسان بالحياه و الموت بمنتهى الروعة

الموت و الحياه و نظرة الانسان ليهم من كاااااام سنه و لسه نظرتنا ليهم هيه هيه ... انظر لترتيب الكوبليهات من تعريفه لك بواقع الحياه وواقع الموت و حتميته و كيف هو مثل دوره الشمس و القمر

البقاء ما هو الا كفترة الحلم رائع ..... ثم الزغلوله الكبيرة بقى شوف ازاى حلهالك و قالك تعيش ازاى اقضى يوما بهيجا ... لاخر الكوبليه

بعد ان استمعت او قرأت هذة الاغنيه تذكرت رأى جميل جدا عن خوف الانسان من الموت الحقيقة هى عبقريه الهيه فلولا خوفنا من الموت و ان الله جعله من الغيب الذى اختصه له
لكنا الان جعلناه حلنا الوحيد فى ايام كهذة التى ضاقت بنا فيها الدنيا من فرط الضيق و الكبت
فخوفنا من الموت يعقبه معادله الهيه تجعلنا نفل منه للحياه رغم قبحها و لكن قبح نعرفه خير من الذى لانعرفه و هذا الخوف كذلك يحركنا لكى نستعد له

سبحان الله العليم الخبير

14 comments:

مــهــــاجـــر said...

عزيزى بيبو

حبست أنفاسى وأنا أقرأ دره من درر الإنسانية وأكاد أتصور نفسى بتكسيدو فرعونى وأنا أستمع إلى هذه الأغنية مع نغماتها التى تأخذك إلى عالم من السحر والغموض والخيال ولا أنتبه إلى نهايتها إلا بعد السكون المطبق على مسرحنا الفرعونى البسيط وأجد الناس وكأن على رؤوسهم الطير يقفون وتلتهب أيديهم بالتصفيق الحار وأنا معهم .

عزيزى بيبو

حفلة غاية فى الروعة والجمال ..وبما أنك المتعهد الرسمى فسوف أكون زبون دائم لحفلات ... من حق هو المطرب أسمه إيه؟

Pianist said...

ايه يا عم ده هيا ناقصة مطربين فراعنة كمان مش كفاية روبي اللي لو عايز تعمل حفلة فرعونية لازم تجيبها عشان الناس تتفرج علي الاجسام الفرعوني فعلا

allfollowsome said...

ايه يا عم بيبو دا كلام برضه بس سيبك انت الفراعنه فراعنه برضه اى نعم كانو حرامية زى ناس بس ياللا اهم مشيو وغارو عقبال اللى فى بالى بس هو لازم احلق شعرى زلطة ولا استنى اخواننا البعدا لما يعملو كده؟؟؟؟؟؟

Zeryab said...

شوية موت
--------------
شوية الموت اللى ف الواحد
هما اللى بيسرقوه
من فكرة الموت
ويخلوه يسيب مية حياته
تسقى حبة الخضرة اللى ف قلبه
وحبة الزرع اللى ف البلكونة
شوية الموت دول
يمكن هما اللى بيخلوا
لابتسامة حقيقية00 معنى
وللعفوية اللى فى الصبح 00وجود

Haitham said...

من هيثم الحفيد الأصغر لتوت عنخ أمون إلى مستر بيبو .. جدى الأكبر يكلفك بنشر الأغاني والأشعار الفرعونية وإنشاء بلوج خاص للفراعنة ..وأنا معاك يا بيبو

إيمان الحسيني said...

ما شاء الله يا بيبو
جميلة فعلا

طبيعة البشر هي الخوف من المجهول
علشان كده فكرة السحرة والمشعوذين وقارئي الفنجان موجودة بطول التاريخ وعرضه
عاوزين دايما نعرف الغيب فيه إيه
وأكتر غيب بنخاف منه هو الموت
مع إنه الحقيقة الوحيدة الثابتة في حياتنا
ممكن إنسان يمرض والتاني لأ
ممكن إنسان ينجح والتاني لأ
ممكن إنسان يبقى غني والتاني لأ
لكن الأكيد إن كلنا هنموت

ربنا يرزقنا حسن الخاتمة
اللهم آمين

Lasto-adri *Blue* said...

بيبو.. فين إحنا اليومين دول والأغانى الرائعة دى..
صحيح هو الترجمة صعبة شوية على الأيام دى.. لكن عارف ساعات بتحسر على جيلنا اللى كل أغانيه هجر وفراق وحب ونيلة وقرف .. ولا ليه فى أى شئ أبعد عن هذا

فين الأغانى الوطنية اللى تعمر بجد.. ولا الأغانى الفلسفية زى دى؟
مين بقى يحب يفكر دلوقتى؟!

مرسى ع الأغنية ومن دلوقت بحجز معاك تذكرة حفلك المقبل إن شاء الله.. بس إعملها فى مسرح ريفولى أو حديقة الأزبكية

Mr-Biboooo said...

اولا انا فرحان لان الاغنية عجبت ناس اهوه يعنى مش انا لوحدى اللى ترالاالى
احنا طول النهار بنسمع لدرجة ان الكلام معدش فارق ... اتمنى يكون فكرة الارتباط بين الانسان و الحياة و الموت وصلت فعلا

مهاجر :- اشكرك يا باشا و اكيد يا باشا من غير متقول اما اسم المطرب فهو معروف بالتاريخ باسم عازف القيثارة فالفراعنة لم يكونو مهتمين بتدوين اسمائهم على اعمالهم و لكنهم يكتبو اسم الملك و الحقبة التاريخية و على فكرة له صورة مرسومه و هو يعزف و يغنى رائعة فعلا اذا كنت من هواة الرسم و كمان معلومة عنه انه اعمى حاجة كده جااامدة

pianist
انا بقول ايه و انت بتفول ايه يا راجل اقرا الموضوع تانى يا باشا

طاهر : ماشى اللى موجود دلوقتى حرامى و حرامى فعلا بس ليه بتقول ان الفراعنة حراميه على فكرة من الظلم ان تختصر الحضارة فى شخصية الملك و تقعقد المقارنة على هذا الاساس
عايز تفهم وجهة نظرى اكتر اقرا بوست موجود على مدونتى اسمه عندك حضارة ادينى امارة

زرياب : وصلت لمعنى الاغنية يا بطل .. و اللى كتبته ميقلش روعه عنها

هيثم : يا نهار ابيض انا مالى ياعم انت هتخلينى اعك مع الفراعنة ليه
اما بالنسبة لبلوج الفراعنة فبشكر روحك الطيبة .. لكن ده محتاج تفكير عموما لو نويت هقولك ... متشكرين يا باشا

ساحر الصحراء : جميل يا عم ساحر .. و متشكرين د

طعمة : معاكى حق .. و اللهم امييييين

لست ادرى : لا كده كتير انا هفتح شركة انتاج و احتكر السوق بقى .. .... فعلا اغانينا دلوقتى بقت قرف و كلها نسخة واحدة
اما بالنسبة للازبكية فنانا اسكندراااااااااانى لية البهدلة

Ahmed Shokeir said...

اطرح الهموم بعيدا عنك و لا تفكر الا فى السرور حتى يأتيك وقتك الذى تذهب فيه الى ارض السكون

وقفت عندها كتير ، وحسيت اننا كلنا نفسنا نعمل كده ، بس مين يعرف ومين يقدر المشكله إن غالبا أن الإنسان لا يستطيع بنفسه أن يحدد ويختار مايفكر فيه

Lasto-adri *Blue* said...

طب قشطة إقتح شركة ونتقاسم المكسب بالنص
إنت عليك الكليمات واللحن والتوزيع والإنتاج
وأنا عليا السلطنة والإشراف!
:PPP

Mr-Biboooo said...

لا اله الا الله
ليه يا لست ادرى انتى هتفضلى طول عمرك كده تيجى على نفسك
لا انا مقدرش اظلمك
حراام انا مش هعمل الشركة خلاص


يادى النيلة الواحد ميعرفش يطلع سبوبة من العيال المدونين دول

Anonymous said...

I have been looking for sites like this for a long time. Thank you!
»

Anonymous said...

Keep up the good work » »

Anonymous said...

تنسيق كليات و معاهد الهندسة الخاصة 2013
كليات الهندسة الخاصة فى مصر بالمصاريف 2013
اسعار كليات و معاهد الهندسة الخاصة 2013
مصروفات الدراسة بالكليات و المعاهد الخاصة 2013
صور بيجامات صيفي حريمي 2013
صور فساتين زفاف للمحجبات 2013
صور فساتين زفاف 2013
صور فساتين سواريه 2013 , صور فساتين سهرة 2013
فساتين سواريه للمحجبات 2013 , فساتين سهرة للمحجبات 2013
صور كلاب 2013 , صور كلاب مفترسة 2013 , كلاب بوليسي 2013
مصروفات المعهد العالي للهندسة و التكنولوجيا بالبحيرة 2013
مصروفات المعهد العالي للهندسة و التكنولوجيا بدمياط الجديدة 2013
مصروفات معهد الدلتا العالي للهندسة و التكنولوجيا بالمنصورة 2013
مصروفات المعهد العالي للهندسة و التكنولوجيا بطموه الجيزة 2013
مصروفات معهد الاهرام العالي للهندسة و التكنولوجيا 2013
وصفات طبيعية لتبييض البشرة
مصاريف الجامعات و المعاهد الخاصة 2013