Saturday, August 13, 2005

جلبى جايد نار


بسبب اللهجة الصعيدية... برجاء تحويل ال ج الى ق .. و شوية حاجات تانية يارب تعرفو تترجموها
واه يا بوووى .... الحجيجة انى مش مصدج نفسى واصل ... العملية بهوجت يا رجالة .... انا خلاص خلصت و معدتش جادر استحمل واصل
يمكن تكونو مستغربين اكمنى عتحدد وياكم صعيدى... مستغربين اياك.... واه... مع انى اسكندرانى ولد اسكندرانى
لكن الحجيجة ... انى ملجتش احسن م اللهجة دى عشان احكيلكوم بيها ع اللى حصل.... خبر غريب .. ويمكن برده يكون اشاعة .... لكن سمعته بودانى اللى عياكلهوم الدود دول .... اتنرفزت .... لجيت نفسى مانيش طايجنى و لا طايج ايها حد واصل... دمى فار
يا
ولداه.... و البنى ادم الصعيدى اللى معشش جوه كل واحد مننينا طلع لما سمعت الخبر ...اصل احنا اكده يا مصريين جوانا دايما كلاتنا عرج صعيدى .... بس لما ودانى يا بوى سمعت الخبر ولا الاشاعة دى هووب طج العرج الصعيدى و فط
الخبر يا احباب... انى كنت ف الكلية من كام يوم ... لجيت زميلتى هناك ... و البت دى عجبال عنديكم اكده اختها عتتجوز الشهر اللى جاى دهوه ان شاء المولى يعنى... و البت كتر خيرها كانت عازمانى عم الاول
المهم لسة عتكلم معاها ... جالتلى .... ( اسكت مش كتب الكتاب دلوقتى بيدفعله تلات الاف جنية للحكومة )... بس و اشتغل فى نافوخى من ساعتها الضوء الشارد
تلات تلاف عفريت ف جتتهم... و الله يا جماعة البت اللى جالتلى اكدة ... جال ايه الواحد مننينا عشان - لمؤاخدة يعنى - يتجوز ايتها حرمة جال الحكومة تاخد تلات تلاف جنية
ولاد البرطوش 000 بجى اكده... ليه هيعملولنا بيهم ايه واخدينهم ليه... يا بوى ده بدل مينقطونى فى الفرح .... و يجى الوزير و اللى يحبنا ميضربش نار
اللى يشوف كده يقول ان الحكومة علمتنى احسن علام و لا شغلتنى و لا حتى جابتلى شقة اتجوز فيها اساسا .. بلاش ... حتى شممونى هوا نضيف و لا اكلونى اكل عدل
ايه البجاحة دى

لكن احجاجا للحج بردك.... البت اللى عم اقلكو عليها دى بتاعة حوارات و لونة كده و ممكن تكون لما حست ان فيه فى مخى ركن صعيدى جالت تشتغلنى
يبجى احنا دلوجيت جدامنا امرين
اول هام يا ولد عمى ان الكلام اللى اتجال ده صح و بحج و حجيج و ساعتها دى تبقى بجاحة و اخر استهزاء باى شرع ولا دين و لا حقوق انسان ... و حياة امى لو ده طلع صح الواحد يتجوز عرفى و يطلع فى بين الناس احسن و اوفر
تانى هام ان الخبر كله يكون اشاعة و مهواش صح.... و دى مصيبة تانية لانى مش بس اللى صدجت الخبر ده كتير من صحابى بيأكدوا.. يبقى ده معناته ان احنا وصلنا لدرجة من عدم الثقة الواضح مع الحكومة و اننا ممكن نصدج عليها ايتها بلوة مسيحة.... ما هى حكومة اساسا بجحة فى كل حاجة جت على ديه
با بووووى.... المهم دلوج ان الحوار ده لو طلع صح هاضطر ابيع قيراطين الارض عشان يدوب اجرا فاتحة الولية اللى ادبيت و حبينها
اه ماهى بسلامتها مش هتدفع حاجة من جيبها فالحة بس .... ماما نفسها تشوفك .... بابا راجل طيب ..... جتها بو

لا طايجها و لا طايج الحكومة و لا طايج نفسى و لا طايج الكل كليلة............. جتهم خابط

10 comments:

mahmoud zidan said...

وه ... وانت جبت الكلام المخربط ده منين عاد .... دلوكيت بنروح نتوكد من عم الشيخ رمضان مازون المركز ...

ياداهية دجى ليكون كلام الواد بيبو ابو لسان زالف ده صحيح

يعنى انت طلعت اسكندرانى اهه ... وانا اللى عمال اقول شفت الجدع ده قبل كده فين ... تقريبا على كوبرى التاريخ

بنت مصرية said...

انت بتتكلم عشان تحس انك بنى ادم

والحكومة بتاخد التلات تلاف جنيه عشان تحس انها حكومة

Anonymous said...

كتر خيرها الحكومة انها بتاخد تلات تلاف جنيه بس مش اكتر ومين عارف ما يمكن انت ظالم الحكومة ويمكن هي بتاخد الفلوس دي عشان تجوز الاولاد الغلابة ولاد الوزراء وولاد اعضاء مجلس الشعب والزغلول الكبير اللي لسه ماتجوزش لحد دلوقتي طبعا انت عارف اقصد مين وكفياكم بقي انت واللي زيك مليتم البلد

مــهــــاجـــر said...

طبعاً مهى المشرحة ناقصة قتلة !!

أصل إنته مش واخد بالك الحكومة جزاها الله خير بتاخد الفلوس دى وبتصرفها على غلابة الحكومة عنا وفى أوجه الخير والإحسان يعنى خد عندك مثلاً واحد مرشح غلبان داخل الإنتخابات يسترزق ويمكن ينوبه من الحظ جانب يطلع منها مكسور الخاطر ؟ طبعاً لأ ده حتى ميرضيش ربنا . ويجعلة عامر

sydalany-وش مكرمش said...

صباحو

Lasto-adri *Blue* said...

نو نو نو مون شيرى...
(وإقرأ الراء كالغين.. تقول إيه بقى.. واحدة بنت ناس وبترطن بالفغنساواى)

بس إشاعة أو مش إشاعة محدش قال لك تحب عشان تتجوز..
وتتجوز ليه بقى إنت فاكغ نفسك بنى آدم ولا إيه؟
يالا..يالا غوح.. غوح.. وإزغع وإقلع القراطين اللى بتكول عليهم.. الجواز والمساريف ليهم ناسه

غوح.. غوح بعيد.. آل تحلم آل

Mr-Biboooo said...

المشكل ان محدش قالى لسه الكلام ده صح و لا لأ لكن عموما الموضوع مش فارق انا اساسا مش هتجوز غير مع وصول مصر لكأس العالم و مش اى كاس عالم لأ ده اللى هتستضيفه موريتانيا


محمود بك زيدان : بجد شرباااااااااااات .... بس انا بعيد عن كوبرى التاريخ حبتين المهم يا ريت تبقى تدى كورسات فى اللهجة الصعيدى امسك الخشب


بنت مصريه: خير الكلام ما قل و دل جبتى من الاخر


مصرى: من ناحية ملينا البلد فعندك حق.... بس احب انبهك لحاجة مش ولاد الوزرا يا معلم انت قصدك احفادهم


مهاجر: اصبحت تعليقاتك على مدونتى من الاشياء الهامة فهى تاتى دائما برؤيه احترمها و يا رب يا سيدى يجعله عامر و على فكرة ان شاء الله لما انوى اتجوز عيب يا جدع اول واحد هقله سلفنى التلات تلاف جنيه

وش مكرمش او صيدلانى : اعتبر ده وعد

لست ادرى: مش عارف ليه حسيت انهم هيأممو المدونه و انى هشتغل جناينى و ابويا هيفتح لما يشوفنى

نفسى : ليه و من قال انى هتجوز اساسا انا كده اتجوز المنديل احسن اللى متعرفيهوش انى اديت للمدام استمارة سته من زمان مع انى بحبها و هى بتموت فيا بس اعمل ايه المستقبل وردى وردى وردى

Guevara said...

أبّاي !! يخرب مطانك ياد يا بيبو كنت حتجتلني م الضُحك .. ياد يا عبييط الحكومة عتاخد النجدية لجل ما تحوشهملك كيف ما حوشتلك الوظيفة و العيشة و الريس الرادل .. يا دردل

Ahmed Shokeir said...

انت هاتلعب فى دماغى ليه... انا اتجوزت من زمااان ومش فاكر انى دفعت حاجه زى كده . انت كده هاتخلينى ارجع اشوف الموضوع ده تانى لكن لو لقيت كده يبقى لازم اطلق الوليه .. لأصل دى مسأله مبدأ
هاها ... وأهى فرصه برده

Anonymous said...

Enjoyed a lot! »