Friday, February 17, 2006

العلاج الصينى للاكتئاب .. قربى يا مدام



الليلة عيد و العريس هيتجوز
و مادام العريس هيتجوز تبقى العروسة هتتجوز

مش عارف ليه انا سعيد قوى اليومين دول .. رغم انى كنت بمر من ايام قليلة بس بحالة نفسية سيئة ... جربت كل ادوية الاكتئاب البلدى طبعا او بلاش نسميها البدى انا سمتها العلاج الصينى للاكتئاب و طبعا العلاج الصينى ده من اختراعى يعنى تقليد تخيل بقى صينى و كمان تقليد

لكن الحقيقة العلاج جاب نتيجة و طبعا انا دلوقتى شايف عنيكو هتنط من مكانها عشان تعرف العلاج الصينى بتاعى ضد الاكتئاب لكن مكانش انعذر مش هينفع دى اسرار عظمى
و لكن اهم قاعدة فى قواعد العلاج هى انك تقتنع انك تحت العلاج و ده يديك احساس بانك فعلا عايز تقضى على الاكتئاب فتبدأ تسخر كل حاجة بتعملها انها تكون ضمن العلاج
مش فاهم ؟ افهمك
يعنى مثلا انت كل يوم الصبح متعود تشرب كوباية الشاى بتاعتك كده عادى .. لا انت المفروض تشربها على انها موصوفالك فى العلاج الصينى يعنى كأن كوباية الشاى دى هتنقذك من الاكتئاب فتبدأ تديها اهمية انت مكنتش تعرفها .. فعلا كوباية الشاى دى هى بداية يومك لازم تهتم بيها اكتر يعنى مثلا تخصص لها مج او فنجان معين و تغسله بنفسك و تختار مكان معين لشربها و هكذا

بالقياس على كده هتلاقى نفسك تحت اسم العلاج الصينى للاكتئاب بتهتم فى حياتك بحاجات انت مكنتش واخد بالك منها و هتلاقى نفسك بتتصل بناس كنت نسيت انهم فى حياتك ... صحاب قدام معارف فهيحصل شىء لذيذ قوى هو انك هتعيد استكشاف نفسك ... و قف قرايه هنا و فكر فى الكلام .... فكرت و لا نصبت عليا

دلوقتى كمل

المشكلة ان احنا بنعيش كل يوم من غير منعيد ترتيب انفسنا من الداخل فبتوه مننا حاجات و ناس و بتضيع مشاعر .. لكن الحقيقة ان كل اللى تاه و اللى ضاع لسه جوانا بس مختفى و تايه فبنحس ان احنا ناقصنا حاجة

انا شخصيا الفترة اللى فاتت كنت تحت العلاج الصينى و استعدت شكل حياتى مرة تانية و مبسوط جدا اليومين دول و عايش فى حالة نفسية جيدة و حاسس انى متصالح مع نفسى ( اقرا البوست الماضى ) و بستغل فرصة ان الحياة ايقاعها بطىء معايا اليومين دول و بتحكم انا فى ايقاعى


على فكرة بقية قواعد العلاج يضعها كل شخص لنفسه .. لان العلاج الصينى ما هو الا رغبتك فى القضاء على الاكتئاب يعنى تحفيز للمناعة
---------------------------

ما بعد العلاج

المشكلة ان العلاج ينتهى دائما و تنقطع صلتك بزجاجة الدواء الوهمية التى افترضت انى اتناولها فتبقى المشكلة الاكبر و هى ان تواجة الواقع الذى تهربت منه بحجة العلاج .. لان ذلك سيكون اختبار حقيقى لقدرتى على التحكم فى ارادتى التى اصبحت الامل الاخير للقضاء على الاكتئاب ..... ربنا يستر و متحصلش نكسة


14 comments:

Unknown said...

ربنا يديمها عليك نعمه يا رب الفرح والانبساط ده
مبسوطااااالك اوى اوىىى يا رب دايما

allfollowsome said...

لا خليك كده
اما فترة ما بعد العلاج اوعى تروحلها
انا مثلا بتعالج علطول
الشاى علاج
البليلة اللى مش بطيقها والله شربتها على انها علاج
وخفيت
!!!!!!!!!!!!!!!!!
بهزر طبعا
يعنى انتى فاهم الصينى ما يعمرش يعنى انت بتشرب الشاى فى البلكونة
ارجع تانى اتعالج بنفس الشاى بس على المكتب
والحياة تمشى يا عم بيبو

ghandy said...

الحقيقة العلاج الصيني ده فعال جداً لكن فقط في حالات الاكتئاب الصيني

اللي هو الاكتئاب البني في تصنيف الألوان

لكن فيه اكتئابات بقى ما تطلعش ولا حتى بالهندي، لازم تواجهها مش تخليها تختفي

S H E B A K said...

انا كنت باستخدم العلاج ده
بس ما كنتش اعرف انه صينى
:-)
باحاول انى (افسى) دماغى من اى شئ و اعمل كل حاجة برااااحة
و بتجيب نتيجة .... لفترة !!!

Alexandra said...

العلاج ده بيخلق عندي حالة روقان مش حالة فرح وانا دايما بحن لحالة الفرح اكتر من الروقان. عموما مبروك عليك الحالة الجديدة

adhm said...

اذا كان الصينى دة حيرجعك تانى تكتب ويرجعنا تانى نستمتع باللى انت تكتبة
اديها صينى على الاخر
اهلا بيك من تاتى
الجنينة مافيهاش ورد كتير علشان احلى وردة
تستقيل وتهاجر

Anonymous said...

دارى على شمعتك تقيد
بس ابقة قول بسم الله قبل كوباية الشاى

wa7da said...

ايه ده .. بقى هوه صيني ؟؟ علشان كدة بقه عدى عليا ... بس هوه مشكلتو انه بيأجل المواجهة مش بيلغيها ..يا رب ما نبطله ابدا ..و يحيا الصيني الى الأبد

Anonymous said...

والله يا بيبو أنت خليت لكباية الشاي طعم ونكهة حلوة ح أجرب العلاج الصيني بتاعك بس يارب مايأثر علي عيني وأبقي زيهم

sherehan84 said...

بلوجك رائع حقيقي .. أنا كنت بتمشّى بين البلوجات دخلت هنا بالصدفه بجد أكتر من رائع .. شكرا

ROMANTIC ROSE said...

أسفه لو هعكنن علي كل اللي فرح بالعلاج الصيني .. لكن بصراحه الصيني كله مضروب .. حتي العلاج ده .. لانه بعد يوم ولا اتنين ولا حتي اسبوع هتحس انك رجعت للروتين و الملل من جديد و تحاول تدور علي "قطع الغيار" مش هتلاقي لان الحلول الجديده هتبقي ارخص و أسهل من "رفة" العلاج الصيني ده ..

محتاجين حل بجد لحالة الملل من كل شئ .. هل من مقترح و مخترع "علي ان يسجل الاقتراح كحل مصري" ؟؟

Mr-Biboooo said...

متشكر انك قلتلى

لكن انا مش فاهم ايه ده

الموضوع منقول بالنص دى وساخة

Anonymous said...

This is very interesting site... Cock cunt porn united states pain relief order online Camping san antonio tx Latin translator+free car monitor installation http://www.levitra-pill.info http://www.blowjob2.info/Palefeetsex.html awning www.cheap-priced-awning.com online sportsbooks Infomercial neurontin Generic cialis overnite shipping

Anonymous said...

Looking for information and found it at this great site... Valium by mail