Wednesday, June 29, 2005

لو حد شاف البت بتاعتى يا ريت يقولها غصب عنه


انا هطق00هيجيلى اسهال فى الاحوال000منى له يا قادر يا كريم
انا سبتها خلاص على الله يرتاحو00سبت البنت اللى بحبها زمانها مالية الدنيا عياط مع انى والله ولا براد بيت ولا احمد عز ولا حتى باتيستا000
بس هى هتعمل ايه مهى المسكينة معرفتش ان حبيبها واخد خازوق كبير فى البلد ديه ولسه يدوب فايق منه00متعرفشى ان اللى خلانى اسيبها يمكن يكون احباط000 يمكن اكتشفت انى ماليش مستقبل00او انى لقيت نفسى مش قادر احلم00
حتى الحبالوحيد فى حياتى00احباطى خلانى اتخلى عنه وعن اجمل انسانة عرفتها 00هى يمكن مش قادرة تفهم انا سيبتها ليه
لكن انا قولتلها ووعدتها انه لو حصل اى تغيير فى حالتى التعبانة اكيد هرجعلها0
%u06

Tuesday, June 28, 2005

سبعين مليون قفا على سهوه

حرااام عليكو يا ظلمة0000

انا مليش غير بابا حسنى00000وبكده يتفسر معنى حرام عليكو

انا00 انا فتحت عينى على الدنيا ديه000ملقتليش رئيس غيره000 كان مالى عليا حياتى00تقدر تقول مستتنى
بين كل صورة وصورة لسيادته تلاقى صورة لفخامته بتقول نعم لمبارك000000

كان رايما بياخد بايدى لدرجة انه بنالى مستقبلى و اختار انى ابنيه فى الصحرا0000هو اينعم المشروع الجبار ده على ما يخلص هيكون حفيد بنت مرات خالى هيكون خلف ابو اول ارض زراعية هناك بس مش مهم000يعدو هوا ماهو اللى خلى 24سنة يعدو000هنستحمل0

حرام عليكو00عايزينى اقول لرجل عظيم زيه 000كفااااااايه000طب هنجيب بابا حسنى تانى منين؟
ما هو اى بابا حسنى تانى ياما مات يا فى السجن يا اتقصص ريشه من بدرى0000انا مليش غير بابا حسنى و ده مش نفاق لان بابا حسنى
لا بيحمينى ولا يحمينى(الاخيرة شدة على حرف ح) ولا فى مصلحة بينى و بينه00مع انه رئيس الجمهورية

Monday, June 27, 2005

اغسل ايدك قبل الاكل و بعده

انا عمرى حاجة و عشرين سنة---السنين ديه عدت عليل بصعوبة خاصة انى دايما بحب احلم----
لكن الفضل كله يرجع لبابا اللى ربانى و علمنى و بفضل تربيته استحملت الكام و عشرين سنة اللى
فاتو و هيئت نفسى استحمل السنين اللى جاية كمان0

بابا علمنى انى:-
1- معيطش عشان انا راجل

2-محطش صباعى فى بقى لما اجوع

3-اقلع الجزمة برة و مدخلش بيها البيت و احسن امشى حافى

4-اللى اعرفه احسن من اللى معرفوش

5-استحمل و معملهاش على روحى

6-المشى جنب الحيط احسن من التنطيط

*****لكن بابا استعمل معايا طرق بايخة فى التعليمى ضربنى و هزئنى و سلبنى حقوقىكانسان0000
وكل ما احاول اوصله بأدب اى اعتراض كان الضرب بيزيد لغاية محاولت اقوله بصوت واطى جدا
ووشى فى الارض000000000لو سمحت كفااااية
يا ترى000ايه رأيك فى بابا اللى انت بالك منه

سلامو عيكو

انا شاب مصرى
وطبعا الشباب المصرى بقى زى الهم ع القلب
مش وقته نقول مين السبب انه يبقى كده
لكن
المهم انى حبيت اعرفكو على اهو كلام
فرصة الواحد يكلم لحسن يتخنق من كتر السكوت او من كتر النفاق
خلينا نتكلم بجد عننا
مفاجأة:- كلنا بنكلم روحنا فى الخباثة و بنسكت لو حد قرب
لأ
اتكلم يا سيدى الكلام اللى بنخبيه
سؤال بتقول ايه لنفسك و انت ساكت؟