Wednesday, August 31, 2005

خبر عاجل


نعتذر عن قطع المسلسل العربى الحرب و السلام لنقدم لكم اهم الانباء

---------------------------------------------------------------------------


علم مراسلونا بمدونة اهو كلام - اللى هو انا طبعا - بهذا الخبر و اليكم التفاصيل

فى ظل المناخ الديمقراطى السعيد الذى تعيشه مصر هذه الايام انا اسف انى افسد عليكم هذا المناخ بذلك الخبر

قام رجال شرطة السياحة بالامس بالتوجه لمنطقة محطة الرمل بالاسكندرية و هى منطقة شهيرة بشركات السياحة المتعددة و لم تقم الا بعمل بسيط و هو انها قامت بتوجيه سؤال سهل و مبسط وواضح و فى مستوى الطالب المتوسط
هو فين يافطة مبايعة مبارك يا استاذ فلان ؟ مع نظرة ذات مغزى و هو انه ان لم تقم بتعليقها فيومك مش فايت

و كانت النتيجة ان اضطر العديد من اصحاب شركات السياحة ان يقوموا بتعليق اليافطات
رغما عنهم

و لو قارنا تلك الحادثة التى اكدها العاملين بتلك الشركات فهذا يفسر العديد و العديد من اليفط التى تملأ علينا حياتنا فى كرنفال الديقراطية العجب

مراسلكم من امام احدى بيوت الدعا ... سورى من محطة الرمل
اخوكم بيبووووو
---------------------------------------------------------------------------


فقرة اعلانية

مدونة اهو كلام تهنأ السيد الرئيس و و السيدة حرمة و السيد نجله و اول و تانى و تالت ...
و رابع و خامس و و سبعة وسبعين حصان و حصوة فى عين اللى ما يشوفك و يديك صوته
و قربى يا مدام قربى يا انسة .. كازيون كازيون و فرصة كويسة
---------------------------------------------------------------------------


sms

هل يمكن ان يشمل التعديل الدستورى و اصلاح القوانين ان يمتد قانون الخلع لنتمكن من ان نخلع رئيس جمهوريتنا على اساس انه برانا من الحق و المستحق

---------------------------------------------------------------------------
و الان
مع برنامج ... طبيخك يا سيدتى

Friday, August 26, 2005

بكلم نفسى لقيت الموضوع كبر


منذ فترة و انا متردد بشأن كتابة هذة التدوينة لعدة اسباب
اولا انا اعلم تماما ان هذة التدوينة لو قدر لها ان تكتب فانى واثق ان لن استطيع ان اتناولها بذلك الاسلوب الساخر او شبة الساخر الذى اعتدت عليه و اعتاد على
ثانيا ان هذة التدوينة هى نتاج تجربة شخصية لا اريد الخوض فى تفاصيلها لانها ببساطة تجربة شخصية
ثالثا لاننى حتما سأجد شخصا ما لن يفهم طبيعة احساسى الان و سأجده راغبا فى فتح نقاشات لا طائل منها
و لكنى فى النهاية قررت ان اجد حلا لكل ذلك بأن اعترف انى لن استطيع الكتابة بشكل ساخر لاننى غير قادر على ذلك بشكل عام اما عن التجربة الشخصية فلن اخوض فيها اما عن ذلك الشخص الذى ذكرته لكم فسأصارحه من الان انى اكتب لنفسى كى اخرج ما فى رأسى الصغيرة تلك و اقرأه ... فاسمحوا لى حتى لو لم يفهم احد ... ممكن
*************************************************

اولا من هو الله ؟ ... ألست مؤمنا انه خلقنى و يرزقنى و يحيينى و سيميتنى و يبعثنى ؟ .. أليست تلك هى معتقداتى و لكن ما الذى يجبرنى على تصديق كل ذلك و العيش على افكار علموها لى ؟ ... مررت بتجربة ما جعلتنى اتسائل تلك الاسئلة و لانى واجهت صعوبة تلك الاسئلة سألت سؤالا اخر ما هو السبيل لادراك الله و ما هى الحكمة التى تجعلنى لا ارى خالقى ؟ .. سؤال
حاورت نفسى كثيرا حول معنى كل ما حولى من تناقضات خاصة عندما رأيت اشخاصا قرروا ان يتخلصوا من تلك المعتقدات التى تعلمتها منذ صغرى ... هنا قررت ان اتخلى للحظة عن الخوف الذى ربوه داخلى منذ كنت صغيرا اسأل فى براءة الاطفال عن هو ازاى ربنا متولدش
قررت ان اجلس مع نفسى و احاورها و قررت ان استخدم نفسى ألم يقل الله انه كفى بالانسان على نفسه شهيدا .. حسنا .. فلاناقش ذلك الامر اذا
***********************************************
كيف لى ان ادرك وجود الله .. لا .. لا تقل لى انظر الى دقة السماء و روعه نظام الكون انا اريد ان اعرفه من نفسى و من داخلى أليس هو خالقى اذن فأين بصمته فى ما خلق الا و هو انا ... كيف ادركه .. فلاتعرف على نفسى انا انسان يريد ان يدرك و انا ادرك من خلال حواسى
البصر = لا شىء لم اراه
السمع = لا يوجد
الشم = لا يوجد
التذوق= لا يوجد
اللمس = لا يوجد
تبا اذا لا يوجد فى حواسى ما يدركه و الحواس تدرك الاشياء المادية .. اذن فهناك طريقان اما ان يكون لا اله ... او انه اسمى من الاشياء المادية لانه خالقها فلو اخترت الاول فانا اتوقف عند الحواس و الغى العقل و هو ما ارفضه اما الثانى فلابحث فيه بعقلى
**********************************************
و يوجد القلب و لكنه محل الايمان فالانسان يدرك الشىء ثم يحبه فلنؤجل القلب بعد العقل
******************************************
لكن العقل ايضا يأبى ان يفهم انه لم يلد و لم يولد .... كيف ... ان ذلك ضد العقل
انا شخص بسيط اعرف قدراتى البسيطة فانا لست خارقا و لكن عندما تمر سيارة مسرعة جانبى فان الادرينالين يجعلنى اقوى و اسرع مما اعتقد اذن فامكانيتى لا احددها بل انها موزعة بداخلى .. و طاقاتى لم احدد مقدارها فهى موزعة تزيد و تنقص حسب الموقف و ليس حسب رغبتى فانا لا ازيد بصرى بمزاجى على حين ان حدقة العين تتسع فى الظلام لارى اكثر
اذن فقدرات عقلى مثل اى قدرات اخرى لا احددها انا .. فهناك شخص ذكى و غبى و الذكاء متفاوت اذن فقدرات عقلى ليست ملكى بل هى منحة مثل باقى القدرات لا اتدخل فى مقياسها و كفاءتها
و هنا ياتى السؤال لماذا العقل لا يقبل فكرة ان هناك اله لم يولد لان هذا العقل قد صمم اساسا على قدرات بسيطة لا تستطيع تصور نظام اخر للوجود غير الزواج و الانجاب رغم انه معروف ان كائنات كثيرة لها طرق تكاثر مختلفة .. فلماذا لا يكون وجود الاله شىء منطقى و لكن عقلى هو الذى لا يستطيع الوصول لتلك الطريقة التى وجد بها لان سقف تفكيرى اقل من تلك القدرة و ايه المشكلة ما فيه مليون حاجة لم يتوصل لها العلم
*****
و ما اؤتيتم من العلم الا قليلا
*****
اذن لو اقتنعت بذلك فلماذا لم يسهل الله الامر و يخلق لى عقل يستطيع ادراكة و يمنحنى من الذكاء ما يدرك كيفية وجوده
لان ذلك يلغى الفكرة من اساسها فكرة خلق الناس و اختبارهم و لهذا فالكائن غير المكلف مثل الحيوان لا يملك العقل
و مع تفكير اكتر
تذكرت ايه تقول و بصرك اليوم حديد
اذن فيوم القيامة ستختلف القدرات و تزيد حتى تتمكن من رؤية الله و مشاهدة العالم الاخر
فالدنيا سريعة و بسيطة و عابرة و اعتبر الله الاخرة هى البقاء الحقيقى و لهذا فعندما اوجدنا فى تلك الدنيا لم يعط لنا الا بصر بسيط و سمع بسيط و هكذا حتى امارس حياتى العادية
و عقل عادى يستطيع ادراك طبيعة الدنيا فقط و ليس طبيعة ما اسماه الله بالغيب
ده غير ان فيه ايه بتقول لا يكلف لله نفسا الا وسعها
فالله يعلم انه يمنحنا قدر قليل من القوة و الادراك فهو لايطالبنا الا فى هذا الاطار فتخيل لو كان منحنا عقل يستطيع ادراكه و بصر يراه و سمع يسمعه ثم عصيناه فكيف سيكون عقابه لنا
**************************************
هنا ادركت العبقريه الاهية التى تفوق عقلى و تتعداه فتجعلنى اسجد اليه .. فكيف اسجد لمن هو فى نطاق قدراتى .. فانا لا استطيع السجود لما اشعر انه فى الامكان ان المسه و اراه يجب ان يكون من خلقنى اقوى و اسمى و اعلى و هو كذلك
سبحان الله
*********************************
و لهذا فالقران يخاطب عقولنا يريدنا ان نقتنع بعقولنا و ما ان تقتنع العقول نأتى لمرحلة القلوب فيخاطبها و يربيها بروحانيات العبادة بعد ان يطمان العقل و لهذا فالمؤمن الحقيقى فقط هو من يجد المتعة فى السجدة و الصلاة و التقرب اليه
استغفر الله
اللهم اهدنى فبيدك الامر كله .. فانت تهدى من تشاء
****
سامحونى لو اطلت بس بجد كل ده بكلم نفسى عشان احس انى بنى ادم .. سلاااااااااااااام

Friday, August 19, 2005

عازف القثارة ما بين الحياة و الموت


هل تتصور انه فى يوم من الايام يمكنك ان تدير قرص المذياع الخاص بك على محطة .... محطه ايه؟.... نجوم اف ام مثلا فتخرج اليك نغمات اغنية تبلغ من العمر ما يزيد عن خمس تلاف سنة !!!!!!!.... هذا الحلم راودنى و بعنف عندما قرأت كلمات تلك الاغنية الحزينة التى تغنى بها مطرب مصرى ايام اخوانا الفراعنة


اكيد مش عارف مناسبه الاغنيه بس ممكن تقل ليالى اضواء المعبد او حتى ليالى منف ايا كان فأنا حسيت الاغنيه قوى رغم انى مؤمن ان اختلاف اللغة يفقدك جزء كبير من الاحساس خاصة اننا بنتكلم هنا عن اغنيه يعنى مش بس افتقدنا الاحساس باللغة لكن كمان فقدنا اللحن و الاداء

لكن معلش تعالى نلعب لعبه عشان نعوض الفقدان ده يعنى بمعنى اخر تعالى نعيش الجو و نخش الموود عشان نستمتع بالاغنيه .... مش فاهم عمرك و انت بتسمع ام كلثوم ما تخيلت نفسك واحد من الناس المنشية اللى قاعده فى الصاله ... كده يعنى
خلاص يالا اخترلك اسم .. لأ رمسيس ايه مينفعش و لا تحتمس دول ملوك يابا .. بص هديك حبه اسماء نقى منها
اعح - حتب و تعنى القمر راضى
كا - رع و تعنى قرين الشمس
نفر - غرد و تعنى الصغير الجميل

اخترت يالا بقى البس !!!! ... لا مش قصدى والله قصدى البس دول .... يووووه قصدى اهوه عبايه كتان مزركشه ماشيه على احدث موضه لفرزاتشى هيليوبليس .... يالا تخيل شعرك زلبطة على موضه الكهنة او انتى يا ستى بقصة ايزيس المشهورة ... ايه متعرفيهاش ماليش دعوة انا مالى .... يالا يالا الحفله هتبدأ

اهوه هو ده المطرب ... ايوه اللى ماسك القيثارة ديه ارقى انواع الات الموسيقيه اليومين دول ... يالا نضف ودنك و اسمع و اتسلطن

ملحو ظة: اسمع كل كوبليه على حده متخنصرش و الربطهم ببعض ده هدف الاغنيه مش هغششك تانى


لا تزال بعض الاجيال تسير و دخل غيرها الى عالم الخلود من ازمنة موغلة فى القدم.... فلا احد يعود من وراء القبر فيخبرنا بما يحتاجون اليه هناك ... او ليريح قلوبنا حتى نذهب الى هناك ايضا حيث ذهبو ترالاملام


رحلت اجسام منذ اقدم العصور و يحل محلها جيل اخر
الشمس تولد فى الصباح و ترتاح عند مجىء الليل .. ينجب الرجال و تلد النساء و تتنفس جميع المخلوقات الحية الهواء ... تولد الاطفال فى وقتها المحدد ثم تذهب الى قبرها
لا يمكن اطالة الحياه و لا يوجد من لا يذهب للعالم الاخر و ليست فترة البقاء فى الدنيا الا بقدر فترة الحلم

اقضى يوما بهيجا .. تمتع بأجمل العطور رائحة و ضع اكاليل ازهار
اللوتس على اكتاف زوجتك و جيدها عسى ان يجلس بجوارك شخص تحبه
ليكن امامك غناء و موسيقى
اطرح الهموم بعيدا عنك و لا تفكر الا فى السرور حتى يأتيك وقتك الذى تذهب فيه الى ارض السكون ) ترالاالام

انتهى الحفل الساهر ايه رأيك بجد والله ... الله بتشتم ليه و الله الاغنيه جميله طب اقراها تانى كده دى عبقريه وصفت علاقة الانسان بالحياه و الموت بمنتهى الروعة

الموت و الحياه و نظرة الانسان ليهم من كاااااام سنه و لسه نظرتنا ليهم هيه هيه ... انظر لترتيب الكوبليهات من تعريفه لك بواقع الحياه وواقع الموت و حتميته و كيف هو مثل دوره الشمس و القمر

البقاء ما هو الا كفترة الحلم رائع ..... ثم الزغلوله الكبيرة بقى شوف ازاى حلهالك و قالك تعيش ازاى اقضى يوما بهيجا ... لاخر الكوبليه

بعد ان استمعت او قرأت هذة الاغنيه تذكرت رأى جميل جدا عن خوف الانسان من الموت الحقيقة هى عبقريه الهيه فلولا خوفنا من الموت و ان الله جعله من الغيب الذى اختصه له
لكنا الان جعلناه حلنا الوحيد فى ايام كهذة التى ضاقت بنا فيها الدنيا من فرط الضيق و الكبت
فخوفنا من الموت يعقبه معادله الهيه تجعلنا نفل منه للحياه رغم قبحها و لكن قبح نعرفه خير من الذى لانعرفه و هذا الخوف كذلك يحركنا لكى نستعد له

سبحان الله العليم الخبير

Saturday, August 13, 2005

جلبى جايد نار


بسبب اللهجة الصعيدية... برجاء تحويل ال ج الى ق .. و شوية حاجات تانية يارب تعرفو تترجموها
واه يا بوووى .... الحجيجة انى مش مصدج نفسى واصل ... العملية بهوجت يا رجالة .... انا خلاص خلصت و معدتش جادر استحمل واصل
يمكن تكونو مستغربين اكمنى عتحدد وياكم صعيدى... مستغربين اياك.... واه... مع انى اسكندرانى ولد اسكندرانى
لكن الحجيجة ... انى ملجتش احسن م اللهجة دى عشان احكيلكوم بيها ع اللى حصل.... خبر غريب .. ويمكن برده يكون اشاعة .... لكن سمعته بودانى اللى عياكلهوم الدود دول .... اتنرفزت .... لجيت نفسى مانيش طايجنى و لا طايج ايها حد واصل... دمى فار
يا
ولداه.... و البنى ادم الصعيدى اللى معشش جوه كل واحد مننينا طلع لما سمعت الخبر ...اصل احنا اكده يا مصريين جوانا دايما كلاتنا عرج صعيدى .... بس لما ودانى يا بوى سمعت الخبر ولا الاشاعة دى هووب طج العرج الصعيدى و فط
الخبر يا احباب... انى كنت ف الكلية من كام يوم ... لجيت زميلتى هناك ... و البت دى عجبال عنديكم اكده اختها عتتجوز الشهر اللى جاى دهوه ان شاء المولى يعنى... و البت كتر خيرها كانت عازمانى عم الاول
المهم لسة عتكلم معاها ... جالتلى .... ( اسكت مش كتب الكتاب دلوقتى بيدفعله تلات الاف جنية للحكومة )... بس و اشتغل فى نافوخى من ساعتها الضوء الشارد
تلات تلاف عفريت ف جتتهم... و الله يا جماعة البت اللى جالتلى اكدة ... جال ايه الواحد مننينا عشان - لمؤاخدة يعنى - يتجوز ايتها حرمة جال الحكومة تاخد تلات تلاف جنية
ولاد البرطوش 000 بجى اكده... ليه هيعملولنا بيهم ايه واخدينهم ليه... يا بوى ده بدل مينقطونى فى الفرح .... و يجى الوزير و اللى يحبنا ميضربش نار
اللى يشوف كده يقول ان الحكومة علمتنى احسن علام و لا شغلتنى و لا حتى جابتلى شقة اتجوز فيها اساسا .. بلاش ... حتى شممونى هوا نضيف و لا اكلونى اكل عدل
ايه البجاحة دى

لكن احجاجا للحج بردك.... البت اللى عم اقلكو عليها دى بتاعة حوارات و لونة كده و ممكن تكون لما حست ان فيه فى مخى ركن صعيدى جالت تشتغلنى
يبجى احنا دلوجيت جدامنا امرين
اول هام يا ولد عمى ان الكلام اللى اتجال ده صح و بحج و حجيج و ساعتها دى تبقى بجاحة و اخر استهزاء باى شرع ولا دين و لا حقوق انسان ... و حياة امى لو ده طلع صح الواحد يتجوز عرفى و يطلع فى بين الناس احسن و اوفر
تانى هام ان الخبر كله يكون اشاعة و مهواش صح.... و دى مصيبة تانية لانى مش بس اللى صدجت الخبر ده كتير من صحابى بيأكدوا.. يبقى ده معناته ان احنا وصلنا لدرجة من عدم الثقة الواضح مع الحكومة و اننا ممكن نصدج عليها ايتها بلوة مسيحة.... ما هى حكومة اساسا بجحة فى كل حاجة جت على ديه
با بووووى.... المهم دلوج ان الحوار ده لو طلع صح هاضطر ابيع قيراطين الارض عشان يدوب اجرا فاتحة الولية اللى ادبيت و حبينها
اه ماهى بسلامتها مش هتدفع حاجة من جيبها فالحة بس .... ماما نفسها تشوفك .... بابا راجل طيب ..... جتها بو

لا طايجها و لا طايج الحكومة و لا طايج نفسى و لا طايج الكل كليلة............. جتهم خابط

Sunday, August 07, 2005

عزيزتى كلنا لصوص


قد يختلف معى البعض او يتفق .. و لكن لم يعد للحب مكانه الدائم عندنا.. و لم تعد قوالب الرومانسية المتكررة و المعروفة يتم تداولها .. و لم يعد الكثير يرحب بفكرة تناول اقراص " هستناك""عمرى معاك".. مقدرش اعيش من غيرك و يا ملك روحى و عشق الروح مالوش اخر .... للاخر
ولكنها رومانسية اخرى.. فاللعبة قد تبدلت قواعدها و لم تعد لعبة ثنائية بل اصبحت لعبة يشارك فيها الجمهور و بكل صفاقة و تناحة
و مع ذلك فانا لن اتحدث عن كل ما سبق - كعادتى- و لكنى سأتحدث فى موضوع يهمك جدا ... وهو نظرية متعارف
عليها باسم
نظرية النسكافية و الكنز

و يطرح الباحثون سؤالهم فى مقدمة نظريتهم...... ليه دايما بيكون النسكافيه او الكنز هما المشروبان الرسميان فى
قعدات الحبيبة فى اى مكان عام و يحتلا دائما مركز الصدارة فى قائمة المشروبات
عزيزتى اللى انضحك عليكى ..... اليكى التفاصيل
اولا : يشترك الكنز و النسكافية فى عدة ميزات لا يختلف عليها اى شاب فى ظروفنا الاقتصادية المعروفة... فهى مشروبات روشة و مش بطالة قدام البنت اللى معاه لانه عادة متعود على منظر كوباية الشاى الحزينة و معاه المعسل او علبة الكليوباترا الحميمة
و برده السعر متقارب و متهاود خاصة فى الفترات الصباحية للكافيهات من 2.5 الى 5 جنية حسب المكان اما فى حالة المينمام فالموضوع بيبقى مترتبله من جمعة
ثانيا : فان النيسكافية و الكنز ... الاختيار بينهما يتوقف على الفتاة فهناك بنات قعدتهم تشرح القلب و تخلى الواحد مستعد يقضى اليوم كله معاها و فى بعيد عنك بنات بتبقى مجبورة ع الواحد
فاصل: من هى البنت المجبوره ع الواحد ؟ .... طبعا هى اما بنت قديمة بقالها مدة و مازال مصيرها غير محدد او بت كئيبة
او البنت صاحبة المقولة الشهيرة و الاشهر و الاكثر شهرة ( تصدق ... انا و ماما ملناش سيرة غيرك ) وهى عبارة لها مغزى
عودة : و بعد تحديد موقف البنت يتم تحديد الاختيار ما بين النيسكافية و الكنز
سؤال : من هم شاربى الكنز ؟......... حسب القواعد الاصلية للنظرية فشاربى الكنز يكونوا عادة من المرتبطين حديثا أو لو معاك بنت بتحبها فعلا و هى اصلا مرحة و قعدتها متتعوضش ( و يا بختك ) أو معاك واحدة فريش و فكة دماغها.......... و فى تلك الحالات يكون طلب الكنز على اساس ان القعدة هتطول والكنز ايضا مقلب لاى بنت لانة بيغريها انها تقوم بدور الرقيقة اللى اقل حبة بيبسى بيدبحوها فتفضل تشرب فيه بتاع ساعة و نص فيضمن عمنا انها مش هتطلب حاجة تانية و القعدة تطول دة غير فرصة الظهور فى دور الجنتل بفتح الكنز و صبه فى الكوباييه ثم عايزة شاليموه يا حياتى طب تلج ... فرصة بقى
و هناك قاعدة استثنائية لنظرية الكنز فهو ايضا مشروب الشباب اللخمة على اساس انه يقدر يضيع بيه الوقت الميت اللى مافيهوش كلام و ميلاقيش حاجة يرغى فيها فيتظاهر بانشغاله بالكنز و ملحقاته من فتح و صب و شاليموه الى اخره
اما شاربى النيسكافيه : فهم الاظرف و الاذكى ( راجع البنات المجبورة ع الواحد أعلى الموضوع ) ... و صدقنى اى تجربة ارتباط لازم تمر بمرحلة النيسكافية يوما ما
فالنيسكافيه كالحب .... ساخن و لكنه يبرد بسرعة ... و عشان كده لازم تشربه بسرعه فينتهى بسرعة و النتيجة الشاب يتخلص من البنت اللى قارفاه بسرعة و آهى اتحسبت خروجة و يالا عايز اروح و خالى جاى من السفر و كده
و ياما ... ياما لحق النيسكافية شباب كتير و خلصهم من زنقتهم مع البنات اياهم ( كآبة - ماما - اخرة الموضوع - بتكلم فلانة ليه)
و الجدير بالذكر تراجع موضوع اتنين ليمون الى مجرد ذكرى و تريئة على اى اتنين رماهم حظهم على سلم الكلية قدام شخص يظن نفسه كوميديان
و عموما فهناك نصائح آخيرة يقدمها لك اصحاب النظرية عبارة عن مشروبات بديلة
للشاب ... لو كنت لسه بتحور عليها جديد فعليك و على القهوة ففنجان القهوة يعطيك قدر من الوقار مطلوب بل و مطلوب جدا خاصة مع موجة الاستظراف التى لا تكف سيادتك عنها لما بتحور جديد.... و ايضا هى حجة معقولة عشان لما تعك فى الكلام تقول انك منمتش و متاخدش على كلامك و دليلك فنجان القهوة
للبنات ... فنصيحة النظرية واضحة و صريحة فى الحتة ديه .... لو حسيتى بغدر و انه الباشمهندس طلع بيحور عليكى فعليكى بالانتقام شربا و فورا.... فلا تتنازلى عن مشروب المانجو او الكوكتيلات اللى اسمائها عجيبة مع تظاهر تام بمعرفتها و اعتيادها و ينصح خبراء التجميل بعدم تفويت الفرصة و رسم ابتسامة النصر او التشفى اثناء دفع الحساب
و فى النهاية فدعوتى لكم انا واضع النظرية هى
نشرب شرباتكووووووووووو

Thursday, August 04, 2005

سؤال برىء


يحدث فى مصر
ليه كلنا شكلنا وحش فى البطاقة الشخصية
و مع انها حالة عامة فى مصر كلها ليه بنكسف نورى بطايقنا لبعض