عندك حضارة....ادينى امارة

تسمحلى اعملك امتحان تاريخ.... عادى متقلقش امتحان فى مستوى الطالب الخيبان.... جاهز.... ماشى..... كل واحد يركز بقى

الاسئلة

مين الللى قام بثورة 19... برافو ...هايل فعلا سعد زغلول

تكمل معانا

مين اللى بنى هرم خوفو.... برافو .. عبقرى اكيد طبعا خوفو

اوكيه مين اللى ..... ولا اقولك... بدل الدوخة و الامتحانات و تقليب المواجع ... احب اقولك ان حضرتك للاسف منجحتش يا برنس

براحه بس ... عادى انا كمان سقطت و حياتك ... ايه .. نعم ... عايز تعيد تصحيح .... بس ...يا... اصل.... ماشى براحتك

بس اصل كدة احنا لازم نتكلم فى الموضوع بقى ....فاضى.... يعنى هتقرا ...و لا هتشوفلك بوست غيره... لا ماهو انا مش اكتب و حضرتك تكبر دماغك ...ده انا سهران ..اه والله الساعه تلاته صباحا

بص يا برنس... انا راجل مدمن تاريخ خاصة تاريخ بلدنا المصون ديه... ايوه طبعا مصر امال السنبلاوين

المشكلة الحقيقيةانى انا كل ما اجى اقرا عن تاريخنا الجميل ده .. خاصة الجزء اللى بيحكم المصريين فيه مصر.. بكتشف انى انا قدام حاجتين

حاجة مش قادر ابلعها و سؤال مش قادر اصدقه

انا فعلا لانى سهران و مش مركز قوى مش عارف ابدأ بمين فيهم... حادى بادى كرنب زبادى اى حاجة منهم عادى... اوكيه حظك كده بقى

السؤال... السؤال هو هل فعلا احنا شعب بتجمعه صفارة و يفرقه كرباج.. وان احنا لازم دايما نستنى ظهور البطل المغوار اللى هيحقق احلامنا

اما الحاجة اللى مش قادر ابلعها ... هو انى كل ما اقرا فى تاريخنا المصون ... احس ان انا بقرا السيرة الداتية لملوك و زعماء... ولو حتى سألت عيل صغير فى تانيه اول ... يا بنى كلمنى عن التضال ضد الاحتلال الانجليزى مثلا... هتلاقيه بصلك من فوق لتحت و قالك يا اونكل انا فى فصل المتفوقين!!! النضال هو ... احمد عرابى .. سعد زغلول.. مصطفى كامل ... محمد فريد و جمال عبد الناصر

بص بقى عشان منكترش لان الساعة دخلت على تلاتة و نص .. فيه حاجه هشرحهالك ولو فهمتها وقف عندك اقرا الموضوع من اوله اما لو مفهمتش فكك يا عم و اقرا اى بوست غير البوست المهبب ده

بص سمى كده.... يعنى ايه تاريخ؟... الاجابة هى ان السؤال ناقص لازم نكمل .. تاريخ الاحداث و لا تاريخ الامم... فرق شاسع

مفيش خلاف ان الحداث يصنعها الافراد... هتلر ... نابليون .. قيصر .. وغيرهم...... انما الحضارة تصنعها الامم..يعنى الحضارة الاسلاميه دول الاف الاشخاص و عشرات الاحيال و الحضارة القبطيه دى امه بحالها ناضلت و كافحت و اتعدبت وا ستمروا

حضارة يعنى امة بكل طاقتها علماء و ادباء و مفكرين و صنايعيه و حرفجيه و رجالة و ستات

فهمت؟ .. طب لو فهمت او مفهمتش انت دلوقتى عارف هتعمل ايه؟

كونك وصلت للسطر ده معناه انك فهمت يا نجم ... اهلا بيك... على فكرة انت بالك طويل اسمحلى ابدأ بقى الموضوع

المشكلة بقى ان احنا بنعلم نفسنا او بيعلمونا التاريخ غلط... بيعلمونا ان الكفاح و النضال شخص وان الاحلام و الافكار شخص و ده ليه تداعيات.... فاضى .. هتكمل سهر ... تشرب شاى .. لا بلاش سجاير

كنا بنقول ايه... اه التداعيات .... اولا ... لو طريقة التعليم ديه مش مقصوده فلازم تتصلح و لو مقصودة فديه جريمة فى حق شعب و امة

ثانيا ان الطريقة دية و التاريخ ده بيخلينا نشك فى نفسنا و فى قدرتنا على اننا نحكم نفسنا بنفسنا

مثال... لما قلنا مش عايزين مبارك طلع اللى يقولك يا نهار اسود و هنجيب مين و كأنه لازم يكون فيه شخص مبهر ليه قدرات خارقة يحكمنا و يستر علينا.... ولمل تقول انك مختلف مع عبد الناصر تلاقى اللى يقولك انه نضف الشعب و علمه .. امال هو مين عمله و علمه

ثالثا تلاقى مصيبة سودا و مطينة بطين ... اننا نفضل عايشين مأجلين حياتنا ورا وهم اسمه البطل اللى هيخلصنا ... سواء بقى كان فى السياسة و لا حتى فى الكورة

ادرجة ان فيه ناس رشحت عمرو خالد للرياسة و كاننا مستعجلين قوى يكون لنا بطل و تلاقينا بنصدق ان محمود سعد ضرب نانسى عجرم عشان شتمت الرسول صلى الله عليه و سلم و كأننا عايزين نصنع بطل حتى لو كان من ورق

و مصيبة لما تلاقى حد فرحان ببن لادن

يووه زهقت من الكلام .. مش ناوى تروح بقى... ما علينا

عايز تبحث فى الموضوع ماشى جرب تدرس الثوره الدينيه عند الفراعنة مرة من خلال شخصية اخناتون و مره من حضارة تل العمارنه بلاش ثوره 19 من ناحيه سعد زغلول ومن ناحية الملحمة الشعبيه

مصيبة لما التعليم يكون فيه تضليل و تقليل لشان أمه قويه عملت اساطير لكن للاسف اتنسبت لاشخاص

قبل ما اخش انام تيجى نبسط الموضوع لابسط حد ... اسأل ابسط واحد فى شارعكو ... جاهل.

..قوله امتى هنحارب اسرائيل هيقولك

لما يظهر صلاح الدين تااااانى

يا جدعان حراااام ... فهمت

عموما لو مفهمتش تصبح على خير و لو فهمت اضرب دماغك فى الحيط

اربع حيطان

برغم كل المحاولات التى اقوم بها للهروب من هذاالاحساس المسيطر على مملكتى الداخلية الخاصة ....الا اننى لا استطيع ان افعل .... فكثيرا ما اعود لاصبح اسيرا لتلك المملكة التى تمتد حدودها من عقلى الى صدرى

احيانا تكون الوحدة حلا لبعض الوقت حتى تعود لمواجهة هذا الكم من العلاقات الانسانية التى تنتظرك بشكل اقوى و بصبر اعظم

و احيانا تكون فرصة مناسبة لكى تتطلع الى مملكتك الخاصة و احتياجاتها ا لتى تكون قد اهملتها نتيجة لهذا الصخب و تلك الضوضاء التى تحيط بك فى كل مكان

فجأة تسكت جميع الاصوات و تسكن جميع الحركات ...و تجلس وحيدا فتخرج كل أشياءك الخاصة على استحياء لتنظفها و تغسلها ...ثم تعود لتضعها داخلك قبل ان يراها احد

تخلع عنك جميع الاقنعة و تزيل جميع الرتوش و تبدى ملامحك الحقيقية ثم تعود قبل ان يراك احد

اربع حيطان.... قد تحوطك و تحيط بأحلامك و افكارك و أحزانك و الامك العذراء...لكن المشكلة انى كلما مررت بتلك التجربة ...اخرج منها و قد زادت حماستى فاصبحت متحمسا لتحقيق كل تلك الحلام الدفينة داخلى و لكنى عندما

اصطدم بالواقع الذى يحوطنى فلا اجد الا ان اخبط راسى فى الاربع حيطان ...كل حيطة على حدة

محدش فاهم حاجة....عادى اهو كلام

الخيانة.....كلمة تحمل قرنى الشيطان....كلمة لها وقع ثقيل على الادن
ما اضيق تلك المساحات التى نستطيع فيها ان نحب او يحب كلا منا الاخر بلا خوف او ترقب......
بالامس........
ارتطمت برائتى او لعلها تفاهتى على ارض صلبة ..خشنة...شاهدتنى و انا ملقى على الارض بجوار كرامتى ننزف سويا و نبكى على كل تلك الاشياء التى تم بعثرتها هنا و هناك ....تلك الاشياء التى كانت قبل الامس هى ما صدقته و حلمت به...كان كل ما يحدث يصاحبه اصوات ضحكاتهم و هى تتعالى.
للحظة....
توقعت انى سانهض..كل مرة كنت انهض لافاجىء هؤلاء الملتفين حول الحلبة يظنون انهم سيستمتعون بهزيمتى بأنى قادر على ان انهى ما يحدث بالضربة القاضيه ثم التف اليهم فيهرب كل منهم الى جحره !!!!
ولكنى لم انهض....لم استطع.....و كانت دقات الساعة تعزف تلك السيمفونية الازلية البغيضة التى تصر على ان تنبهك ان الوقت يمر ..كانت الساعة تدق باصرار و كأنها تؤكد انى اهزم..
بحثت عن نفسى و كدت ابكى لها كى تنهض بى ولا تدعنى عرضة امامهم...واكنها كانت تأبى و عندما وافقت و كدت ان انهض .وجدت وجه صديقى ........
صديقى........
مبتسما كعادته....هادئا كعهده ....يقف منزويا فى ركن الحلبة التى صرعنى فيها يتظاهر بالقلق و ينظر لى بشفقة...منتظرا اعلان فوزه و هزيمتى
تبا....هو لا يستحق شعار النصر ولا البطوله ولا اى من تلك المرادفات السخيفة .....انا ....... انا اعلم انه خاننى ....وجدته يحتضن النجاح و انا يحتضنى الالم بل يقيدنى الالم.
مرت اوقات الهزيمة و عدت للحياه و لا اعلم لما لم اخبر احد انى اعرفه على حقيقته...خائن محتال... لما ابقيت على صداقتنا رغم انه خانها و بددها عشرات المرات..
كانت تلك اسئلتى التى لم اجد لها اجابة...و لكنه حتما لم يجد الاجابه على سؤال واحد ..وهو لما لم لنهض و اقضى عليه بالضربة القاضية كعهدى مع كل من نازعنى تلك الحلبة
لا اظن انه سيفهم ابدا......
احيانا اشعر انى سعيد بنجاحه....تبا لى ....انا ليه غبى كده؟؟؟؟؟؟؟؟؟؟؟؟؟؟؟؟؟؟؟؟

يووووه ....انا زهقان بفعل فاعل

ما اسوأ النهر الخالى من الماء -------- حكمة فرعونية

لا اعلم لماذا اتذكر تلك الحكمة دائما عندما افكر فى اشياء كثيرة مثل المستقبل......الحب......النجاح ......او حتى عندما ابحث عن معانى لكلمات مثل الاستقرار و الطمأنينة و اهمية الحلم وضرورة الامل
حقا...
ما فائدة النهر الذى نسعى اليه و نأتيه لنجده خاليا من الماء ...اشعر بهذا الاحساس عندما ارى كم الاشياء التى تحولت الى هيكل أو اطار لشىء فارغ تماما...


ثم اعود لاعلق على نفسى - كعادتى - فأقول والله الفراعنة دول عفاريت مش بس قدروا يعرفو اسرار الطب والهندسة و التحنيط قبل الناس كلها لا كمان عرفوا الحالة اللى هتوصلها البلد بعد كل القرون و العصور ديه من العصر الفرعونى حتى العصر المباركى.
فلقد استطاع الفراعنة بتلك الحكمة المختصرة وصف الكثير من احوالنا مثل التعليم و الصحف القومية و الاعلام المحلى و ايضا اشياء مثل الحب و الحلم
فأنت تجد الحب اصبح هيكلا او ( نهر خالى) عليه لافته سمجه تقول لك ...ابقى قابلنى....
و الحلم فى خيال شاب ما تجده اطار فارغ عليه تعليق سخيف يقول لك بابتسامة لزجه..طار فى الهوا شاشى

و اشياء اخرى و اخرى...فالغضب السياسى تحول ايضا بفعل فاعل الى مجرد جعجعة و صوت عالى دون اى جدوى او رغبة حقيقيه و امتدت الهياكل و الانهار الخالية لتجعلك تسأل نفسك سؤالا منطقيا لماذا نتمسك بتلك الهياكل الكثيرة و نعتز بها (قوى كده) فما الحكمة وراء مجالس تشريعيه لقوانين يتم طبخها و ما فائدة دستور يتم تعديله ليلائم لون جزمة السيد الرئيس....بلاش...ليه نسنتكر العرى فى الكليبات و نرحب بيه و نسقفله فى الشارع و على الشواطىء و كمان نستخدمه فى الدعايه لبلدنا على الفضائيات تحت اسم السياحة

لكن ارجع و اقول ان كل ده مش مهم المهم هو الانسان نفسه ...انا مؤمن بكده... لكن المصيبة لما يتحول الانسان نفسه ده الى نهر خالى من الماء...مجرد اله تقوم باداء واجباتها اليومية بشكل روتينى و يكون التحول ده كمان بفعل فاعل و بتعليم معلم على مدار فترة تعليم طويلة
نهر بلا ماء او بمعنى اخر بلا لحظة تفكير بلا رغبة فى حلم حقيقى بلا ابداع بلا احساس....
و ..... فى (شطحة من شطحاتى ) تخيلت انى التقطت صورة للبلد كلها بشوارعها و حواريها و ناسها و أفكارها و احلامها و نبضاتها و كل حاجة فيها
لقيت نفسى ماسك صورة ماسخة ..مخوخة...مخرومة...فاضية ....صورة معمولة بفعل فاعل
ساعتها خفت....و حسيت بوحدة ولقيتنى مش عارف حتى استخبى فى الزحمة...........................................................................

وهكذا تم تفسير 00000صباح الزفت يا عم احمد

عم احمد شخصية طيبة وهو بطبيعة الحال غير معروف لاحد منكم و ان كنت متأكد انه ثمة عم احمد يجب ان يكون فى حياتك 00وحتما ستجده هنا او هناك لا يكف عن مناداتك ( صباح الخير يا دكتور ) لو كنت كلية طب ولا صيدلية 000 او ( صباح الخير يا باشمهندس ) كلية هندسة او حتى صباح الخير يا استاذ
لو كنت فى اى مكان تانى
طبعا كان الرد الطبيعى بتاع كل مرة هو صباح النور يا عم احمد00لكن المرة دى فلتت منى 00لقيت نفسى مش طايق ابتسامته الطيبة المتفائلة زيادة عن اللزوم و لقيتنى بقوله صباح الزفت يا عم احمد
مش عارف ليه المرة دى كرهت قوى نظرة الرضا اللى فى عنيه دى 000اموت و اعرف ايه اللى راضيه قوى كده00فجأة لقيت النظرة دى مستفزانى و مش طايق اشوفها
لقيت نفسى بقوله كلام كتير وهو لسه محتفظ بالنظرة اياها000قلتله انت عارف انا كل يوم بفكر فى ايه ؟
بفكر فى علاقتى بربنا و التزامى و صلاتى000000 بفكر فى الكلية و زمايلى اللى من كل شكل و فى المحاضرات و الامتحانات و النجاح والسقوط 00000بفكر فى ميزانية الشهر 0000
و اكيد بفكر فى البنت اللى بحبها و بفكر فى المشاكل المتلتلة اللى بطلعلنا لسانها كل يوم و بتقولك اخبط دماغك فى الحيط00000000وبالتالى بفكر يا ترى لو سبتها هاعمل ايه 0000ساعات كمان افكر قوى فى ماتش الاهلى اللى جاى و طبعا ساعتها مضطر افكر فى ماتش الزمالك 0000000 بفكر فى السينما و فى اخر اغنية000000بفكر كمان فى السياسة و بلاوى السياسة و فى الحكومة و وعود الحكومة و احلامى فى تغيير ام الحكومة0000000ولما بشطح افكر فى اسرائيل و العراق و امريكا00000و بفكر فى الكلام اللى بيملو بيه دماغنا عن السلام و دفع عجلة السلام و يا سلام يا سلام و سلام مربع للجدعان000000و بفكر فى كلام واحد قالهولى عن اخواتى اللى بيموتو هناك وانهم مسئولين منى يا نهار اسود00000و اكيد تلف تلف وتفكر فى المستقبل و الشغل والوظيفة فتحلم قوى و تفوق وتحلم تانى وتفوق وتفضل تحلم و تحلم لغاية متاخد على دماغك و تنسى يعنى ايه احلام000و تفكر انك مظلوم وتفكر مين اللى ظلمك00000و فى النهاية بعد كل التفكير ده تبدأ تعقل و تهدى و تركز و تبدا تفكر ازاى تعيش عيشة اهلك و تحط اكبر فردة جزمة جوه بقك وتخرس للابد و تكتفى انك ترسم النظرة الراضية المتفائلة القنوعة بتاعة عم احمد

يمكن عشان كدة اتنرفزت قوى من نظرته لانى حسيت انى بشوف نفسى بعد عشرين سنة و العمر بيجرى و بيطلعلى لسانه 000000000000طبعا انتو عارفين انه مفبش حد اسمه عم احمد بس ده الشبح اللى بخااااااف منه

اخيرا

عن عدم كتابة مقالته MR BIBOOO يعتذر
لهذا الاسبوع

---------------------------

والله عارف انى بستظرف بس اعمل ايه بقراها كتير هموت واكتبها ....... مرة من نفسى

قال يا فرعون ايه فرعنك قالك عزبة ابويا يا بارد

ايه الحكاية
الحكاية انى و انا عمال اقرا فكتب التاريخ - لانى جالى احباط من الحاضر - لقيت اسطورة جميلة جدا قلت لازم احكيهالكو
يمكن كتير مننا يعرفوا الثور ابيس لكن مش كتير يعرفوا علاقته بالحاكم --- المهم الخلاصة انه معبود مصرى وكان رمز للخصوبة والقوة اما عن حكاية ارتباطة بالحاكم فكلنا عارفين ان الفرعون من دول كان تلقيحة ما يصدق يوصل للحكم تلاقيه بلط فى الخط و حكمله بتاع عشرين ولا تلاتين و ساعت اربعين سنة و الله ---- ومنهم اللى حكم اربعة و عشرين سنة ( طبعا مفيش اى اسقاط هنا)
المهم -- كان الفرعون لما يحس ان سيطرته و قوته و شعبيته قلت كان بيخاف قوى خاصة لو حد قاله كفاية و لا ارحمنا و لا حل عن قفانا --- طب ساعتها كان بيعمل ايه؟؟؟؟؟؟؟
ساعتها كان الكهنة و الحاشية - برضه مفيش اى اسقاط هنا - كانوا بيشوروا عليه بالحل اللى هو احتفال الطور ابيس ----ازاى؟ ---- اقولك ----
يبعت عمك الفرعون و يجمع اكبر عدد ممكن من الناس فى المعبد فى مكان اسمه الفناء المفتوح و يقوم الكهنة-لاحظ- يلبسو الملك ديل طور و كمان قرنين و يقفوه فى الفناء و يدخلو عليه الطور ابيس الغلبان اللى الملك طبعا يقوم مديله العلقة التمام و يضرب الملك الطور المسكين فتنبهر الناس بقوة الملك و ترجع هيبته قدام الشعب قوية رغم انه لو اى حد فكر للحظة هيكتشف انها تمثيلية
المهم طبعا انه مفيش اى اسقاط فى القصة ديه لا على الملك ولا الكهنة و لا حتى الطور
على فكرة الاسطورة ديه حقيقية و حصلت فى غهود فراعنة كتير زى رمسيس التانى
لكن يا ترى ايه الدروس المستفادة زى ماكانوا بيقوللنا و احنا صغيرين------

قال يا فرعون اية فرعنك قالك عزبة ابويا يا بارد