حبيبتى انا خلاص عرفت انا هخطفك ازاى .. انا عرفت المكان الى هنروحه .. هتبقى مبسوطة اوى .. عارفة .. هنسافر .. هنروح اى مكان فيه تلج .. لأ جليد .. الجليد هيبقى حوالينا فى كل مكان .. ابيض . لا .. ابيض و ساقع .. و احنا كمان هنبقى سقعانين و لا بسين تقيل اوى .. عارفة ليه هنكون سقعانين .. عشان هنشيل كل الماسكات الى على وشوشنا و هنبقى احنا .. احنا بكل وضوح
عارفة ؟ .. مش هنقول لحد على مكانا غير الناس الى بنحبهم و يحبونا حب حقيقى زى التلج .. لأ .. زى الجليد .. ابيض .. ابيض و ساقع .. هنفضل طول النهار نتزحلق على الجليد و نضحك .. منقولش لبعض غير الى جوانا .. ش هنجمل الكلام و لا هنحمله معانى تانية
و بالليل هنام فى خيمة بسيطة عشان نحلم احلام بسيطة ... و فى الفجر نصحى .. هنشغل قرآن بصةت عالى و نصلى الفجر جماعة و نقرا سورة مريم .. و نحط راسنا ع التلج لأ على الجليد .. و ندعى ربنا .. يارب . متفرقناش عن بعض و خلينا احنا .. احنا بجد
و بعد كده نستعد لاحلى وقت .. هنروح عند صخرة عالية نتجمع عندها .. انا و انتى .. نمسك ايد بعض .. و نستنى الشمس لما تطلع تسيح كل التلج ده .. و يروح الجليد .. و نرجع للواقع .. و احنا عارفين لاول مرة شكل بعض بجد
=========================================================
الكلام ده لقيته فى كراريسى القديمة كنت كاتبه فى مسرحية من تأليفى
الكلام ده انا قوى
الكلام ده انا من جوايا
الكلام ده ليا انا لوحدى لانى انا الى فاهم معناه مش اى حد تانى
و انهارده بالذات لقيته بيطلعلى من درج المكتب
انهارده بالذات . توقيت مناسب جدا
كل الى اقدر اعمله انى اقول شكرا للبنى ادم الوحيد الى يستاهل كلمة شكرا
بجد انا سعيد جداااا و مهما حصل مش هوفيك حقك ... كل الى اقدر اقوله ان احلى شىء فى الدنيا انك ترجع لحد ثقته فى حلمه
هو قالى شكرا لانى رجعتله ثقته و الى مكانش يعرفه انه هو الى كان عكازى و صديقى بجد
شكرا
انا مصدق نفسى قوى متقلقش و عمرى ما هرجع اشك فيا و لا فى احلامى تانى بجد شكرا يا صاحبى
>
