Friday, July 01, 2005

قال يا فرعون ايه فرعنك قالك عزبة ابويا يا بارد


ايه الحكاية
الحكاية انى و انا عمال اقرا فكتب التاريخ - لانى جالى احباط من الحاضر - لقيت اسطورة جميلة جدا قلت لازم احكيهالكو
يمكن كتير مننا يعرفوا الثور ابيس لكن مش كتير يعرفوا علاقته بالحاكم --- المهم الخلاصة انه معبود مصرى وكان رمز للخصوبة والقوة اما عن حكاية ارتباطة بالحاكم فكلنا عارفين ان الفرعون من دول كان تلقيحة ما يصدق يوصل للحكم تلاقيه بلط فى الخط و حكمله بتاع عشرين ولا تلاتين و ساعت اربعين سنة و الله ---- ومنهم اللى حكم اربعة و عشرين سنة ( طبعا مفيش اى اسقاط هنا)
المهم -- كان الفرعون لما يحس ان سيطرته و قوته و شعبيته قلت كان بيخاف قوى خاصة لو حد قاله كفاية و لا ارحمنا و لا حل عن قفانا --- طب ساعتها كان بيعمل ايه؟؟؟؟؟؟؟
ساعتها كان الكهنة و الحاشية - برضه مفيش اى اسقاط هنا - كانوا بيشوروا عليه بالحل اللى هو احتفال الطور ابيس ----ازاى؟ ---- اقولك ----
يبعت عمك الفرعون و يجمع اكبر عدد ممكن من الناس فى المعبد فى مكان اسمه الفناء المفتوح و يقوم الكهنة-لاحظ- يلبسو الملك ديل طور و كمان قرنين و يقفوه فى الفناء و يدخلو عليه الطور ابيس الغلبان اللى الملك طبعا يقوم مديله العلقة التمام و يضرب الملك الطور المسكين فتنبهر الناس بقوة الملك و ترجع هيبته قدام الشعب قوية رغم انه لو اى حد فكر للحظة هيكتشف انها تمثيلية
المهم طبعا انه مفيش اى اسقاط فى القصة ديه لا على الملك ولا الكهنة و لا حتى الطور
على فكرة الاسطورة ديه حقيقية و حصلت فى غهود فراعنة كتير زى رمسيس التانى
لكن يا ترى ايه الدروس المستفادة زى ماكانوا بيقوللنا و احنا صغيرين------

قال يا فرعون اية فرعنك قالك عزبة ابويا يا بارد

4 comments:

Guevara said...

زي الفسيخ ،و التنس ،و الدخّان ثبت علمياً إن مصارعة الثيران عادة فرعونية قديمة!!!!،يبدو أنها ستعود للنور قريباً في مصر ،و إن اختلف شكل الثور

ربنا ما يقطعلنا عادة

SaSo said...

اضرب المربوط يخاف السايب
طول عمره شعب جبان ومستعبد بضم الميم ع الاقل فرعون بتاعنا _ومفيش اسقاط هنا- ربنا يكمله بعقله مقلش ابنولى هرم

shady said...

بس رمسيس طرد الغزاه
اما ابن امريكا ده بيستورد غزاه

Anonymous said...

المهم طبعا انه مفيش اى اسقاط فى القصة ديه لا على الملك ولا الكهنة و لا حتى الطور
Mesada2ak walahy men 3'eir ma te7lef :-)