Wednesday, July 27, 2005

عندك حضارة....ادينى امارة

تسمحلى اعملك امتحان تاريخ.... عادى متقلقش امتحان فى مستوى الطالب الخيبان.... جاهز.... ماشى..... كل واحد يركز بقى
الاسئلة
مين الللى قام بثورة 19... برافو ...هايل فعلا سعد زغلول
تكمل معانا
مين اللى بنى هرم خوفو.... برافو .. عبقرى اكيد طبعا خوفو
اوكيه مين اللى ..... ولا اقولك... بدل الدوخة و الامتحانات و تقليب المواجع ... احب اقولك ان حضرتك للاسف منجحتش يا برنس
براحه بس ... عادى انا كمان سقطت و حياتك ... ايه .. نعم ... عايز تعيد تصحيح .... بس ...يا... اصل.... ماشى براحتك
بس اصل كدة احنا لازم نتكلم فى الموضوع بقى ....فاضى.... يعنى هتقرا ...و لا هتشوفلك بوست غيره... لا ماهو انا مش اكتب و حضرتك تكبر دماغك ...ده انا سهران ..اه والله الساعه تلاته صباحا
بص يا برنس... انا راجل مدمن تاريخ خاصة تاريخ بلدنا المصون ديه... ايوه طبعا مصر امال السنبلاوين
المشكلة الحقيقيةانى انا كل ما اجى اقرا عن تاريخنا الجميل ده .. خاصة الجزء اللى بيحكم المصريين فيه مصر.. بكتشف انى انا قدام حاجتين
حاجة مش قادر ابلعها و سؤال مش قادر اصدقه
انا فعلا لانى سهران و مش مركز قوى مش عارف ابدأ بمين فيهم... حادى بادى كرنب زبادى اى حاجة منهم عادى... اوكيه حظك كده بقى
السؤال... السؤال هو هل فعلا احنا شعب بتجمعه صفارة و يفرقه كرباج.. وان احنا لازم دايما نستنى ظهور البطل المغوار اللى هيحقق احلامنا
اما الحاجة اللى مش قادر ابلعها ... هو انى كل ما اقرا فى تاريخنا المصون ... احس ان انا بقرا السيرة الداتية لملوك و زعماء... ولو حتى سألت عيل صغير فى تانيه اول ... يا بنى كلمنى عن التضال ضد الاحتلال الانجليزى مثلا... هتلاقيه بصلك من فوق لتحت و قالك يا اونكل انا فى فصل المتفوقين!!! النضال هو ... احمد عرابى .. سعد زغلول.. مصطفى كامل ... محمد فريد و جمال عبد الناصر
بص بقى عشان منكترش لان الساعة دخلت على تلاتة و نص .. فيه حاجه هشرحهالك ولو فهمتها وقف عندك اقرا الموضوع من اوله اما لو مفهمتش فكك يا عم و اقرا اى بوست غير البوست المهبب ده
بص سمى كده.... يعنى ايه تاريخ؟... الاجابة هى ان السؤال ناقص لازم نكمل .. تاريخ الاحداث و لا تاريخ الامم... فرق شاسع
مفيش خلاف ان الحداث يصنعها الافراد... هتلر ... نابليون .. قيصر .. وغيرهم...... انما الحضارة تصنعها الامم..يعنى الحضارة الاسلاميه دول الاف الاشخاص و عشرات الاحيال و الحضارة القبطيه دى امه بحالها ناضلت و كافحت و اتعدبت وا ستمروا
حضارة يعنى امة بكل طاقتها علماء و ادباء و مفكرين و صنايعيه و حرفجيه و رجالة و ستات
فهمت؟ .. طب لو فهمت او مفهمتش انت دلوقتى عارف هتعمل ايه؟
كونك وصلت للسطر ده معناه انك فهمت يا نجم ... اهلا بيك... على فكرة انت بالك طويل اسمحلى ابدأ بقى الموضوع
المشكلة بقى ان احنا بنعلم نفسنا او بيعلمونا التاريخ غلط... بيعلمونا ان الكفاح و النضال شخص وان الاحلام و الافكار شخص و ده ليه تداعيات.... فاضى .. هتكمل سهر ... تشرب شاى .. لا بلاش سجاير
كنا بنقول ايه... اه التداعيات .... اولا ... لو طريقة التعليم ديه مش مقصوده فلازم تتصلح و لو مقصودة فديه جريمة فى حق شعب و امة
ثانيا ان الطريقة دية و التاريخ ده بيخلينا نشك فى نفسنا و فى قدرتنا على اننا نحكم نفسنا بنفسنا
مثال... لما قلنا مش عايزين مبارك طلع اللى يقولك يا نهار اسود و هنجيب مين و كأنه لازم يكون فيه شخص مبهر ليه قدرات خارقة يحكمنا و يستر علينا.... ولمل تقول انك مختلف مع عبد الناصر تلاقى اللى يقولك انه نضف الشعب و علمه .. امال هو مين عمله و علمه
ثالثا تلاقى مصيبة سودا و مطينة بطين ... اننا نفضل عايشين مأجلين حياتنا ورا وهم اسمه البطل اللى هيخلصنا ... سواء بقى كان فى السياسة و لا حتى فى الكورة
ادرجة ان فيه ناس رشحت عمرو خالد للرياسة و كاننا مستعجلين قوى يكون لنا بطل و تلاقينا بنصدق ان محمود سعد ضرب نانسى عجرم عشان شتمت الرسول صلى الله عليه و سلم و كأننا عايزين نصنع بطل حتى لو كان من ورق
و مصيبة لما تلاقى حد فرحان ببن لادن
يووه زهقت من الكلام .. مش ناوى تروح بقى... ما علينا
عايز تبحث فى الموضوع ماشى جرب تدرس الثوره الدينيه عند الفراعنة مرة من خلال شخصية اخناتون و مره من حضارة تل العمارنه بلاش ثوره 19 من ناحيه سعد زغلول ومن ناحية الملحمة الشعبيه
مصيبة لما التعليم يكون فيه تضليل و تقليل لشان أمه قويه عملت اساطير لكن للاسف اتنسبت لاشخاص
قبل ما اخش انام تيجى نبسط الموضوع لابسط حد ... اسأل ابسط واحد فى شارعكو ... جاهل.
..قوله امتى هنحارب اسرائيل هيقولك
لما يظهر صلاح الدين تااااانى
يا جدعان حراااام ... فهمت
عموما لو مفهمتش تصبح على خير و لو فهمت اضرب دماغك فى الحيط

15 comments:

shady said...

لا بص انا معاك ان تريخنا ناقص ناقص كتير اوى ناقص الاوار التانيه التالته لحد الميه نقص شروحات فى التحركات الشعبيه المتزامنه قبل ومع وبعد الثروات من الناحيه دى انا معاك مليون الميه
بس برضو يا عزيزى دور القائد مهم والقائد ده مش الاسطوره اللى حيعمل كل حاجه لاء ده واجهه بس تلم الناس بيها وحواليها
لكن هذا لا يمنع ابدا ان الادوار الشعبيه اكثر اهميه وهى الضامن الوحيد لاستمرار الثوره
ولهذا ستجد ان كل ثوراتنا وئدت بعد وفاة قادتها
هذا رايى والله اعلم

littilemo said...

والله انت بتفكرنى بمجموعه من المدونين مع بعض مره وحده
كتاباتك رشيقه وممتعه جدا

sydalany-وش مكرمش said...

إيه يا عم البلطجة دي
طب أنا بالعند فيك قريت الموضوع لآخره و كنت مقتنع تماما


مش بوجهة نظرك
لإن وجهة نظرك صحيحة من غير نقاش

لكن كنت مقتنع إني مستمتع

Mr-Biboooo said...

عم شادى
مختلفناش ..... لكن تأجيل الحياه و الاحلام شىء صعب و انه يبقى واقع فده شىء مخيف
عموما كلامك فى محله ومتفق مع كلامى مش شايف اختلاف

littilmo
و يا ترى هما مين المدونين دول
اما بالنسبة للرشاقة و المتعة فاشكرك رغم انى بقالى اسبوعين او اكتر مكتئب

وش مكرمش او صيدلانى او وش مكرمش ما علينا ايا كان اسمك فبلوجك رائع رائع يا ولدى
و امنى انى اقدر اقنعك على طول


ساحر الصحراء
اول تعليق ليك على البلوج بتاعى ليك صابونة هديه
و يا لريت تقولى ايه اللى جميل و ايه اللى صح

Haitham said...

فعلا من مشاكلنا أننا مستنيين دايما البطل المغوار المستخبي ورا ستارة ومش هيطلع الا يوم القيامة .. مش كتير مننا بيتخيل انه ممكن يكون البطل

Milad said...

أنا موافق معاك. جزء من المشكلة إن التاريخ مس بيكتبه المؤرخ لكن بيصنعه على مزاجه، وإحنا ماتعلمناش في حصص التاريخ إننا نجادل المؤرّخ ونقارنه بمؤرّخ تاني صنع التاريخ بشكل مختلف. بنتوهم إن ممكن يكون فيه تاريخ محايد مع إن ده مش موجود. أكيد التاريخ من وجهة نظر القائد مختلف عن وجهة نظر الجنود، ومن وجهة نظر الحاكم غير المحكوم والمنتصر غير المهزوم، لكن للأسف القائد والحاكم المنتصر غالبًا بيكون أشطر في إنه يخلي المؤرخين يصنعوا التاريخ من وجهة نظره، وعلى فكرة دي مشكلة عامة مش بس في التاريخ المصري.
ـ

Pianist said...

للاسف قيس علي كده حاجات كتير اوي
مش بس التاريخ السياسي اللي احنا متعلمينه غلط ده المصيبة الاكبر في التاريخ الديني
وبخاصة تأسيس دولة الاسلام
احنا لسة لحد انهارده عندنا حتة تأليه الرموز
يعني تقدر مثلا تشتم عمروبن العاص قدام اي حد؟
قليل لما يضربك
لكن التاريخ بيقول ان عمرو بن العاص كان فاسد
وعادي انك تعترض علي حكمه للبلد
او مثلا لو جيت تدور علي عصر الامويين واللي عملوه من نهب وسلب وبلاوي متلتلة
او تعالي مثلا نتكلم عن عثمان بن عفان ونشوف ازاي ودي الدولة الاسلامية في داهية يعني حاجات كتير
وتأليه الشخصيات بأه هوه القاعدة
عندك حق يا ابني استمر

allfollowsome said...

والله احنا لما نكون داخلين موضوع من الاول بنكون شعب يفرقه كرباج و و الخ
اما مع الوقت صدقنى بنحس ولو نحسنا حنعرف نعمل حاجة مع العالم الباردة اللى معندهاش اى احساس بمدأ ان كله قاعد فى التكية اللى سايبهاله المرحوم بس والله رذالتنا وقرفنا ليهم هو اللى حيمشيهم

مــهــــاجـــر said...

عزيزى بيبو

عداك العيب وجزح يا باشا ... بس فية حاجات لازم ناخد بالنا منها .. زى إية :

أولا ً التاريخ غالباً مـُسيـّس يعنى مكتوب على مزاج وأهداف ولـّى النعم ومن وراءه .

ثانياً: سمعت عن المقولة التى تقول :" التاريخ يصنعة المنتصرون " الكلام دة صحيح لذلك فمعظم الأحداث متطلسمة علشان سياسة التلميع الورنيشى لقصة " المصريين أهمة حلوية وعزم وهمة"

ثالثاً : بعضهم يريد النبش فى التاريخ ويطلع القطط الفاطسة منه بس عشان يثبت إن الزعيم الفلانى كان أمرتى أو كان خمرجى ولا الخليفة علان مكانش لية حق فى إلىّ عملة مع صاحبة وحبيبة وإن سيدنا علان كان بيجرى ورا مصلحتة ... طيب يا عم الحاج إستفدنا إية ؟ هل تقدمنا خطوة لما حضرتك تسعى لإثبات صحة نظريتك ؟ وإية العائد إلىّ يعود على أبنى وإبنك لما تحطم لة رموز البلد والدين ؟ وإية العائد إلىّ هيعود علينا لما ولادنا مش يبقى لهم كبير وملهمش قيمة أو قدوة يتمسكوا بيها ؟ ماهو البركة فيك خليت كل الناس أرازل .. كلامى ده مش معناة إن رموز الدين والسياسة والشعوب هم من جنس الملايكة وأنهم معصومون من الخطأ والخطيئة ولكن لكل مقام مقال ولكل عصر حديث .

والكلام ده يتناقض مع قصة تأجيل الأحلام لحين وصول البطل المخلص .

بيتهيأ لى إن التاريخ لازم يكون حافز ودافع لنهضة الأمم وإلا إية الفايدة إلىّ هتعود لما نظل نحكى ونتشدق فى سير ناس ماتت وشبعت موت ؟

Mr-Biboooo said...

مهاجر باشا
انت مبعدتش عن اللى انا قلته يا باشا بالعكس انت اكدته
لكن انا كنت اقصد ضرورة الثقة فى نفسنا و ان التاريخ يساعدنا على ده مش يفقدنا ثقتنا

mahmoud zidan said...

انت اثرت موضوع جامد جدا يا بيبو .. وباسلوب رشيق فعلا ....
التاريخ بتاعنا بالاضافه الى انه به الكثير من المغالاة والتحريف .. الا ان الاخطر من كده انه بيشير باصابع خفية الى انتظار سبارتاكوس محرر العبيد لاخراج الناس من عبودية الاسياد .. يعنى خليك قاعد مستنى ما تعملش حاجة ... ليه ما يحاولش كل منا انه يخرج البطل اللى جواه يمكن يكون هو البطل المطلوب ؟؟؟؟؟؟؟؟؟؟

مــهــــاجـــر said...

الأعزاء بيبو / محمود

للأسف الشديد علشان نثق فى أنفسنا تانى ، فية ركام كبير من التلقين و التركيع النفسى فوق كاهلنا لازم نتخلص منة، زى :

أولاً : سياسة التجويع وكسر الهمم المتبعة بين الناس بحيث موضوع التاريخ دة يصبح نوع من الترف الفكرى لأن الناس مش فاضية للكلام دة ووراها عيال وبيوت مفتوحة، ولهم عذرهم

ثانياً : للإجابة عن سؤال محمود الأخير ، لابد من التخلص من الكثير من الموروثات الشرقية والموروثات التى إكتسبناها عبر الزمن . فحاجة زى توريث الحكم، دى حاجة أبائنا ونحن من بعدهم بنمارسها كل يوم فكل أب يجبر أبناؤه على تبنى نفس أسلوبه فى الحياة وتوريث أعمالهم ومهنهم وبالتالى مش تستغرب إن واحد زى طويل العمر عاوز يورث حكم مصر لإبنة الصغير .

أما بالنسبة لموروثات الزمن أعتقد إنكم متفقين معايا بإن " الأنا " و"الذاتية" وحب النفس هى صفات غالبة فى معظم الناس ، تأملوا معى العبارات المتداولة بين الناس وفى أذهنا مثل : " مصلحتى أبدى من أى شئ " ،" أنا ومن بعدى الطوفان" ، " إلى ّ يعوزه البيت يحرم على الجامع " - ملحوظة حط بدل الجامع أى حاجة الشغل ، المدرسة ، الجامعة ، البلد...إلخ - ، " عيش ندل تموت مستور " ، "إن كان ليك عند الكلب حاجة قولة يا سيدى " ... أظن عرفتوا أنا أقصد أية ؟

hesterua said...

بص يا ابنى
لازم نعرف ان احنا كويسين
وهنقدر نعمل حاجة وان الدول التانية مش احسن مننا
وايران مش اجدع مننا
وان النبى صلا الله عليه وسلم وصى علينا
وان احنا هنكون حاجة كبيرة قوى
و اللى احنا بنالدهم مش احسن مننا
لأ و خايفين مننا

Mr-Biboooo said...

كويس و انا نقلتش غير كده

انا بقول ان احنا كزيسين قوى و جامدين جدا و تاريخنا يشهد اننا عملناملاحم

لكن لاننا دايما بننسب ده لاشخاص فاحنا دلوقتى مش عارفين نعمل حاجة

Anonymous said...

تنسيق كليات و معاهد الهندسة الخاصة 2013
كليات الهندسة الخاصة فى مصر بالمصاريف 2013
اسعار كليات و معاهد الهندسة الخاصة 2013
مصروفات الدراسة بالكليات و المعاهد الخاصة 2013
صور بيجامات صيفي حريمي 2013
صور فساتين زفاف للمحجبات 2013
صور فساتين زفاف 2013
صور فساتين سواريه 2013 , صور فساتين سهرة 2013
فساتين سواريه للمحجبات 2013 , فساتين سهرة للمحجبات 2013
صور كلاب 2013 , صور كلاب مفترسة 2013 , كلاب بوليسي 2013
مصروفات المعهد العالي للهندسة و التكنولوجيا بالبحيرة 2013
مصروفات المعهد العالي للهندسة و التكنولوجيا بدمياط الجديدة 2013
مصروفات معهد الدلتا العالي للهندسة و التكنولوجيا بالمنصورة 2013
مصروفات المعهد العالي للهندسة و التكنولوجيا بطموه الجيزة 2013
مصروفات معهد الاهرام العالي للهندسة و التكنولوجيا 2013
وصفات طبيعية لتبييض البشرة
مصاريف الجامعات و المعاهد الخاصة 2013