Monday, January 16, 2006

توازى



عندما كنت صغيرا ( مش اوى يعنى ) كنت أحب شكل الخطوط المتوازية تلك الخطوط المستقيمة التى تمتد على نفس الاتجاه الى مالا نهاية و كلا منها له خصائص الاخر ... فلو انحنى احدهما او غير اتجاهه فعلى الاخر ان يقوم ايضا بالانحناء او تغيير الاتجاه ليكون عاى نفس التوازى

عندما صرت كبيرا ( مش اوى برضه ) رسمت لنفسى خطا مستقيما أسير عليه فى حياتى .. و اتهمنى البعض انى مجنون او غريب الاطوار خاصة لانى كنت أتعمد افساد الكثير من علاقاتى بأصدقائى و لم أكن أحتفظ الا بالقليل منها .
فأنا بطبعى أكره الصخب و الضوضاء و التطفل ... و أحب أن اسيرمع صديق أو صديقين على الاكثر مقلدا بذلك نظريتى التى تعلمتها فى الصغر .. نظرية الخطوط المستقيمة .. التى تنحنى مع انحناء صديقاتها و تستقيم مع استقامتها ... ركز بقى مش كل شوية هفكرك

لهذا فان أجمل الصداقات التى مررت بها فى حياتى هى التى ظلت على تلك الهيئة و لكن ما كان يفسد بعض الصداقات الاخرى كان شيئا من اثنين

أولهما .. عدم التوافق عند تغيير الاتجاهات فتجد نفسك منتظرا لصديقك ان يتغير معك و لكنه يفاجئك باتخاذ الاتجاه الاخر و المعاكس فلا تصيرا متوازيان و طبعا بالتطبيق على نظريتى و على كل قواعد الهندسة و حساب المثلثات و الجبر و الحساب فانكما ابدا لن تلتقيان مرة اخرى و للابد او الى مالانهاية

اما السبب الاخر فى فشل علاقات الصداقة الاخرى فكان الرغبة فى التقاطع او التداخل .
و هو ايضا شىء مستحيل فى قانون التوازى الذى اتخذته لنفسى كقاعدة لتكوين صداقاتى .. فقانون التوازى مريح جدا للطرفين فيمنح لكل صديق الحق فى ان يسير مع الاخر فى جميع الاتجاهات و لكنه يمنع التطفل او التقاطع ... بمعنى انه يمنع ان تأخذ مكانى أو تتدخل فى حياتى فى منطقة محظورة فتتورط فى ان تجعل الخطان المستقيمان يلتقيا و يصيرا متقاطعان كحرف اكس فى الانجليزية مما يجعلهما و بنفس المنطق لن يلتقيا مرة اخرى

أما فى الحب ( واخد بالك من الحتة الرومانسية دى ههههه ) فوجدت

انى اكتشفت ان ما يحدث هو العكس تماما ( ابسلوتلى ديفرنت ) .. فقانون التوازى كان يجعلنى سعيدا و لكنه كان يجعل الطرف الاخر غاضبا بصفة دائمة فهو يرغب فى كسر التوازى و يرغب فى التداخل و التقاطع بحكم انه لمؤاخذة يعنى النص التانى .... و هو الشىء الذى يجب ان اعترف صاغرا انه من حقه و لكنى اكره ان يدخل احد فى خطى المستقيم حتى لو بدعوى انه يحبنى اى تحت مبدأ الحب

و لكنى افضل حب اخر ... انا لا اريد حبا يفرض تدخل و تطفل على حياتى .. و لكنى انتظر ان تأتى هى ( او علها اتت و لم ارها او رأيتها و عملت نفسى مش واخد بالى ) فتأخذنى الى نفس الموجة التابعة لها فأتغير من قوانين الرياضيات الى قوانين الطبيعة

هه بس خلاص





16 comments:

ابن مصر said...

بص الجزء الاول في البوست بتاعك عن المستقيم والمثلث والجبر مفهمتش منه حاجة اصل انا كنت ادبي
:)
بس عن الحب احلي حاجة انك في قاعد امان الله وبعدين واحدة متعرفهاش تدخل حياتك تدخل بعنيها النعسانة وبقها النص مفتوح وتخدك جوه العالم بتاعها وفجأة تلاقي نفسك اتغيرت وبقيت بتسمع مزيكا مختلفة وتقرا كتب جديدة وتلاقي نفسك بتحب البوكي مان علشانهاو تلاحظ دايما ان الورد لونه احمر زي شفايفها وبتقول علي العيال الصغيره انهم ملايكة بعد اما كنت بتقول عليهم شياطين والعياذ والله ورايحة البارفان بتاعها بتخلي جسمك يرتعش وتضم وشها علي وشك وتحس بانفاسها السخنة وتقولها ياههههه انت كنتي فين من زمان....هو ده الحب يا صاحبي لو متدخلتش عالمها عمرك ماحتحبها

Unknown said...

معظم الرجال هم اللى بيكسروا قانون التوازى مع اللى بيحبوهم وبتوازوا ويتقطعوا ويتداخلواويتدخلوا ويمسحلها خطهااللى ماشيه عليه ويرسملها خط تمشى عليه بتاعه هو ومتحودش عن اللى هو رسمهولها ... :|

ماشى الطريق said...

فكرة جامدة مووووووت يا بيبو وفى إنتظار أن تنتصر قوانين الطبيعة على
قوانين الرياضة

خوليو said...

فى الحب بيحس الانسان كأنه ملك زمانه لأنه بيجعل كل شىء من حقك

وساعتها بقى ياباشا هايكون كتب كتابك على ايد نيوتن شخصيا

Lasto-adri *Blue* said...

بيبو.. مع إنى مجربتش الحب وبتاع
*أه لسا جاهلة*
بس بص ح قول لك حاجة.. من وجهة نظرى لازم كل واحد يتنازل للتانى.. يعنى لازم تكسر خطك وتطاطى شوية.. حبة ليك وحبة ليها عشان المركب تمشى.. لاننى مش بنتكلم عن حب يوم ولا اسبوع ولا حتى سنة.. إحنا بنتكلم هنا عن عمر طويل انشاء الله ح يتقضى بحلوه ومره

وربنا يعينك بقى على كسر خطوطك

change destiny said...

skew
دة اسم خطين متوازين مختلفي الاتجاه .
فكرة حلوة بس حاسة ان تنفيذها في الحقيقة يبقى صعب قوي . أنا دنيتي زي ما انت أكيد لاحظت " شكل غير منتظم"

Anonymous said...

بيبو الجميل
بما اننا بنتكلم عن التوازي تلاقي يا بيبو في حاجات كتير بتبقي ماشية معانا في الحياة ماشية جنبنا موازية لينا .. يعني منها عادات حلوة ووحشة منها طباع ومنها مشاكل بلا حلول تمشي معانا فترة وبعد شوية تلاقيها مشيت لوحدها .. اللي عايز اقولة ان المشكلة مش في توازي الخطوط المهم ان الخطوط تعمل شكل مفيد مربع مثلاً .. يعني بيت جميل تعيش فية انت واللي بتحبه

عشقك ندي said...

كل شيء ممكن ومباح في الحرب والحب وللأسف يا باشا المرأة أي مرأة لن تقبل سوي التدخل والتدخل الزائد عن الحد هما كده ربنا خلقهم كده علشان ماتبقاش كل حاجة حلوة في حياتنا فننسي ربنا لازم يبقي في حاجة تخلينا نطلب رحمته دايما ربنا معاك

ruby said...

لية انت واخدها تدخل لية ميبقاش حب زايد من الطرف الاخر او ان الطرف الاخر داة عاوز يحيط عالمك كلة باهتمامة فعاوز يعرف كل حاجة عنك لية بتخدها على انة تدخل لا انا مش
معاك فى داة
واغنيتك حلوة اوى

allfollowsome said...

بيبو الخط المستقيم مع ناس زى اللى عايشه دلوقته
ماينفعش يا صحبى
لانك لو سبتهمن فى حالهم
مفيش حد حيسبك فى حالك
فكر كويس

ROMANTIC ROSE said...

انا مش معاك ف انك تتنازل عن مبدأك أصلا .. ده مش معناه اني معاك .. بس برفض التنازل .. ليه ؟؟ قلتلي ليه .. اقولك .. لو هتتنازل يبقي كان زمانك اتجوزت من 10 سنين اي واحده .. المفروض الواحد بيدور علي واحده زيه .. شبهه .. علي الاقل ما يصطدمش بيها ف حياته .. يعني زي مانت ليك خطوطك المتوازيه اللي بترفض تقاطعها لاي سبب هتلاقي أكيد أكيد أكيد واحده منكده علي روحها و قاعده مستنيه واحد يقتنع بفكرة توازي الخطوط و عدم جدوي بل و استحالة التقاطع .. هي اكيد موجوده بس هتقابلها او لا هتيجي او لآ معرفش .. بي اغلب الظن هتيجي ان شاء الله لو فضلت متمسك بمبداك ..

عن المبدا نفسه .. بصراحه انا مش معاك لان التقاطع ساعات كتير بيكون مفيد .. و الوحده تساوي الملل في اغلب الاحيان .. عارفه انك ما تقصدش التوحد .. بس من وجهة نظري الصداقه من وجهة نظرك و الحب بمبدأك ليسوا اكثر من مسميين خاليين من مضمونهما الدافئ ..

و دمتم زخرا للوطن ..

Admin said...

u r talkin about what we call in psychology Codependence and interdependence, in codependence one partner is more dependent on the other ,usually weaker and this relationships usually never work, on the other hand in interdependence , both lovers dont interfere in each others life but they join forces 4 the welfare of both, they depend on eachothers equally,usally a very healthy relationship, i ll talk about this stuff in details later on but thank u 4 bringin up this topic

aliaa abdalfatah said...

الموضوع فعلا راااااااااائع
بس معروف دايما إن الاقطاب المتشابهة تتنافر والأقطاب المختلفة تتجاذب

adhm said...

افتكر دايما
الزواج مقبرة الحب

Mr-Biboooo said...

بجد يا جماعة انا اسف لانى مبردش على التعليقات لكن

ميرسى اوى

و كويس انكوا محستوش انى مجنون

خوليو said...

مين فينا عاقل مين مجنون ؟؟؟