مش هتفرق لو مقريتش

لم يعد هناك سوى اللحظات التى لا رجاء منها الا قضائها

اعلم ان اللحظات لا يمكن تعويضها و لكنه شىء لا مفر منه

الحب و العمل و الاحلام صاروا بلا عنوان .. فلم يعد من المحتمل ان ترى شيئا منطقيا فى تلك الايام و كأن العبث صار عنوانا موحدا لكل الاماكن

هل يشعر احدكم برغبة فى البكاء
هل يشعر احدكم بالاختناق
هل يشعر احدكم انه صار لا يبالى
هل يشعر احدكم اساسا

هل اصابتك تلك الاسئلة بالذهول .. هل تتلقى ردك من عقلك الان ؟ . اشك

ايهما اقرب للحقيقة ؟ البكاء ام الرغبة فى البكاء .. الحب ام البحث عن حب ؟ .. الحضن ام الدفء ؟ البيضة و لا الفرخة ههههه توهااااااااااااااااااااااان

يقول مفكر شوارعى عظيم من مقهاه الشهير و هو بيشرب كوباية الشاى و يدخن الكليوباترا

مشكلة الانسان تكمن فى الطاقة ؟
فيصفق و يهلل مريدية من مثقفى المقاهى المعلبين ... فتاخذة الحماسة فيزيد مرددا الطاقة لا تفنى و لكنها يا سبحان الله لا تستحدث من عدم فيهتز المكان من الاعجاب و التصفيق
غادرت المكان و انا افكر فى مشكلتى مع الطاقة و هل هى فلسفية ام انها مشابهة لمشاكل ابى مع الطاقة الكهربية مع فاتورة كل شهر فاكتشف فى النهاية ان مشكلتى انى لا اعلم وصفا لطاقتى هل هى طاقة حرارية ام حركية ام فوزية

المهم
اننى قد قررت ان لا اكترث كثيرا بكل هذا الهراء فالطاقة موجودة موجودة و انا موجود موجود ... ارددها كثيرا موجود موجود تأتى فى ذهنى عدة تفسيرات لموجود موجود فاجده احيانا اسما مشابها لمحمود محمود مدافع الزمالك ثم اشعر انه موجود موجود يصلح اسما لبواب صعيدى لعمارتنا ثم بعد تفكير اجد مغزى اخر لموجود موجود فالتمس فيه نبرة زهق او يأس و كأنتى اردد موجود موجود اعملكوا ايه

او موجود مورننييج فاتذكر اسم صابونة تحمل هذا الاسم فيدفعنى هذا الى التفكير بعمق لماذا تحمل الصابونة اسم جود مورننج هل هناك ما يدفع الشركة ان تطلق هذا الاسم على صابونة و هل الصابونة لا تستخدم الا فى غسيل الوش الصبح ... انا أعتقد انه لو بالمنطق التعبان ده كانوا سموها احسن بون بيتى على اساس اننا بنستخدمها بعد الاكل او سموها و لمؤاخذة شفيتم لاننا بنستخدمها بعد الحمام سورى يعنى
ايه السذاجة دى فعلا المشكلة فى الطاقة .. الانسان كائن قادر على التفكير حتى و هو نايم و المشكلة ان التفكير مبيقفش عشان كده انا عمال اكتب . رغم انى مش فاهم حاجة

لأ...لازم وقفة .. ايه معنى اللى انا كتبته .. أعتقد ان البداية كانت محاولة للفلسفة و فشلت فقلبت بتريئة على الفشل و فى النهاية قرار بالتخلص من البوست و ده كله نابع من احساس عام بالملل .
....او يمكن لانك مش عايز تكتب ... اصل انت لو كتبت هتنفجر .. هتبدأ تشتم ناس كتير و يمكن يا مجنون انت تشتم نفسك مليون مرة و انت بتكتب عن نفسك و عن الحلم اللى فرطت فيه و كعادتك وقفت فى ابعد نقطة عن حلمك بتحاول تضحك

لكن الضحك بيطلع يجرح فى زورك ..... تبتسم لكن عينك تتملى بحرارة دمعك ... ههههه فى صحتك .... احساس صعب انك تكشف نفسك

بتكتب عن صابونة جود مورننينج و بتضحك ... و انت من جواك صريخ !! ... المشكلة ان انت مش عارف الصريخ ده جاى منين .. زى بالظبط مشكلة الانسان مع الطاقة .. لا تفنى و لا تستحدث من عدم ... موجودة موجودة

و انت صريخك اللى جواك .. رفض للواقع اللى انت فارضه على نفسك بطريقة موجود موجود رغم انها مش مبررة و لا مقنعة تمام زى اسم جود مورننينج اللى مش مبرر انه يكون اسم صابونة

لكن المشكلة انك انت ضيعت وقتك فى قراية البوست و مطلعتش غير بالصابونة
حلال علينا

اعتذر عن اللحظات التى اضعتها لك