Saturday, December 03, 2005

حتشبسوت و سيننموت ... قصة حب لا يعرفها سواك




هناك شىء واحد قد لا يدفعك لقراءة هذه التدوينه و هو انها تدوينة طويلة حبتين
بينما هناك ثلاث اشياء تدفعك لقراءة تلك التدوينة : -
1- ان تكون مهتما بفهم سيكولوجية المرأة
2- ان تكون مهتما بالحضارة الفرعونية
3- انك تكون فاضى

أولا هناك مبدأ هام لفهم سيكولوجية المرأة الا وهو انك ابدا لن تفهمها ... ثانيا هناك مبدأ هام ايضا لفهم التاريخ الفرعونى الا وهو ان الكل فى خدمة العرش مادام العرش يخدم الكل ... و اخيرا هناك مبدأ هام... لما تبقى فاضى و هو ان تحاول دائما ان تستمتع

القارىء فى التاريخ الفرعونى يستمتع فعلا بقراءته لشخصية مثل حتشبسوت و لا أدرى بالفعل كيف غفل عنها علماء علم النفس و أطباءه .. و لتكون على وعى بما اكتب هقولك تاريخها فى الانجاز . هى ابنة الملك تحتمس الاول من الزوجة الرئيسية و عند موت تحتمس الاول كان وريثه هو تحتمس الثانى و لكنه كان ابن لزوجة ثانوية و لهذا لم يملك الحق الشرعى ليصبح الملك و هنا ظهرت حتشبسوت و هى الابنة الرئيسية و الاحق بالملك و لكنها كانت امرأة فتزوجا و حكما معا و على حظها كان تحتمس افندى الثانى ده راجل صحته على اده و قضى فترة حكمه اجازات مرضى و كانت هى الكل فى الكل و بقت خبرة و عرفت خبايا الحكم

و على غرار برنامج بين الناس يشعر تحتمس الثانى بقرب موته فيعلن ابنه تحتمس الثالث اللى هو ابنه من زوجة غير حتشبسوت وليا للعهد و بدراما فائقة يموت فعلا و لكن لم يكن تحتمس الثالث الا بامبينو صغير فوافق الجميع على تولية حتشبسوت كنائبة لغاية ما يكبر و لكن بعد سنتين اغتصبت العرش و حبست تحتمس الثالث

الفكرة هنا ان تلك المرأه استطاعت ان تضحى بأنوثتها بمزاجها من أجل العرش مرة لما ضحت بجسدها مع راجل لمؤاخذة عيان جدا و اتجوزته بس عشان تقرب من المنصب بتاع الملك و مرة تانية لما قدرت تتناسى مشاعر الانثى الرقيقة و تحبس الولد الصغير و تحرمه من الحياة فى قبو موحش و التضحية الكبيرة لما ظهرت للناس كرجل و عاشت كراجل و اتصورت فى المعابد كراجل و قصت شعرها و غيرت لبسها و لبست دقن كمان و بالوقت اتعاملت حتى من الكهنة كرجل

و لكن وسط كل تلك الخشونة يظهر سننموت وزيرها و أكثر من أخلص لها .. ترى هل أحبته... هل ذكرها بأنوثتها فهو الرجل الوحيد و الشخص الوحيد الذى سمحت له بأن يقترب منها بل و يسجل اسمه و صورته بجوار اسمها و صورتها على جدران المعبد رغم انه من عامة الشعب

لو كنت مهتما بالتاريخ الفرعونى لعلمت انه من المستحيل السماح بذلك لكن لو كنت مهتما بسيكولوجية المراة لعلمت ان شيئا ما تحرك فى قلب تلك المرأه جعلها تجتاز كل التقاليد

هذه المرأة ظلت تحكم مصر لعشرين عام و تخدع الشعب المصرى الذى يصدق رجولتها و تأليهها و اشترت سكوت الكهنة بالمكافأت و تعظيم الههم على الألهة الاخرى . لعبت بكل الاوراق من أجل المنصب و أرضت جميع الاطراف ... ما عدا سننموت فهى لم تقدم له شيئا بل هو من كان دوما يساندها لتعزيز مكانتها بل و عندما قررت ان تبنى معبدا ظل يبحث و يبحث عن تصميم له حتى اهتدى فكرة لتصميم فريد لم يحدث من قبل و لا من بعد فى العمارة الفرعونية و هو شىء صعب عند الفراعنة فهم ليسوا من هواة التغيير . و لكن الاهم هنا انه و بعد ان صمم المعبد و بناه حفر لنفسه قبرا تحت هذا المعبد
ترى فيم كان يفكر وقتها .. هل كان يحاول اقناعها بفكرة التضحية فى الحب ام يريد ان يقول لها انه خادمها و تحت قدميها . . هل أن تكون خادما يرضى المرأه؟ لا اظن انه كان خادما و لكنه كان عاشقا ذكيا.. فاهم قصدى؟؟؟؟؟

و بعد عشرين سنه من الحكم كرجل و بعد بناء المعبد و المقبرة تأتى المفاجأة .. قوية و مدوية

تختفى حتشبسوت تماما

يظن المؤرخون ان تحتمس الثلث الذى كان حبيسا طوال العشرين عاما هو المتسبب و لكن انا لا اظن فكيف يستطيع ان يفعل ذلك و لماذا لم يستطع طوال العشرون عاما خاصة و ان الجميع كان مستفيدا من وجود حتشبسوت فمصر فى حالة اقتصادية هائلة و الكهنة يعيشون ازهى عصورهم

فى رأيى ان الحب هو من وراء الاختفاء ... فبعد عشرين سنة من الحياة كرجل قد تكون قررت ترك العرش من أجل حبيبها سننموت و تهرب معه و يختفيا للأبد و كقصة حب لم تعرف مثيل

سؤال .. هل تفعل المرأة ذلك

لو كنت مهتما بالحضارة الفرعونية لعلمت ان حتشبسوت كانت اقوى من عشرات الرجال اللذين حكموا مصرو ستعلم ايضا ان كل رجال الدولة و كهنتها كانوا يخافونها و يستيفدون من وجودها و انه من الصعب ان ينجح تحتمس السجين من التامر عليها

و لو كنت مهتما بسيكولوجية المرأهلعلمت ان المرأة البتى تنكرت لأنوثتها عندما يأتيها فارس أحلامها الذى يستطيع ان يكشف عن جمالها المختفى قد تترك كل شىء من اجله حتى لو كان عرش مصر و حتى لو كان لقب ابنة الاله الاعظم .. فلو تحرك قلبها لقلب الموازين
و هذا هو جمال المرأه

و لو كنت فاضى سيب كومنت


32 comments:

Anonymous said...

يا سلام وانت بقى اللي فاهم سيكولوجية المرأه ؟؟
انا فعلا زهقت بقى من الرجاله اللي فاكرين انهم فاهمين كل حاجه ..وللا سف بيطلعوا فعلا ولا فهمين الست و لا بطيخ
..
عامة متشكره اوي على حصة التاريخ دي

Mr-Biboooo said...

يا اختى انا لم ادع اننى احلل سيكولوجية المرأة انا فقط ارصد حالة تاريخية و ااحاول ان استشف من وراءها شيئا ما

عموما يا ريت تعيدى قراءة البوست تناى و هتعرفى انك استعجلتى و ظلمتينى و الله

و بالنسبة لحصة التاريخ فانا بعرض عليكى كمان حصة فى الشجاعة عشان تقولى انتى مين

و ميرسى على البطيخ بتاع حضرتك

a.nashat said...

اللى يزهق بجد حكاية الانونيماس الشجعان دول

ROMANTIC ROSE said...

مش فاضيه بصراحه .. بس هسيب كومنت .. عجبتني القصه بس ماستغربتش .. الست تبيع اي شئ و كل شئ علشان راجل يشعرها بانوثتها .. و 80 ف الميه من جمال المرأه و قوتها و انوثتها يكمن في ضعفها .. فلما يحسسها بضعفها لما يبقي الوحيد اللي واقف جمبها لله ف لله و بدون هبات و عطاياو يعاملها علي انها ست مش راجل حتي و لو بدقن اكيد لازم تبيع السلطه و و ممكن تبيع عمرها كمان علشان خاطره .. تخيل بقي لو سيننموت ده كان بعت لحتشبسوت ف عيد ميلادها جواب غرابي زي اللي ف البوست اللي فات .. هيكون رد فعلها ايه ؟؟

رجاااااااااااااااء .. بالله عليك .. تكبر الخط لاني مش بعرف اقرا الخط الصغير .. عاجز نظر يا سيادنا .. ممكن ؟

HERA said...

تصدق دى بقى ألز نهاية للملكة الاسطورة دى
فعلا اللى تتحرم من أنوثتها وييجى حد يفكرها بيها ممكن تعمل اكتر من كده عشانه

wa7ed mn masr said...

يا مستر بيبو بعيداً عن تناولك للتاريخ بطريقة روايات عبير أظن أن الحدوتة تاريخياً محتاجة شوية مراجعة من مراجع تاريخية مهمة

Mr-Biboooo said...

استاذ واحد من مصر

انا طبعا مش مسئول ان حضرتك بتقرا روايات عبير و متأثر بيها قوى كده

ثانيا انا منتظر التعديلات التاريخية للحدوته

ملحوظة الفكرة من التدوينة هى تخيل قصة حب قد تكون حدثت بين ملكو ووزيرها اما الاحداث الاخرى فهى سليمة بناءا على دراستى للتاريخ الفرعونى لمدة تتجاوز اربع سنوات

منتظر تعديلاتك يا استاذى و الخلاف لا يفسد للود قضية

و اؤكدلك انى فى حياتى لم اقرا مرة واحدة رواية لعبير دى

wa7ed mn masr said...

مستر بيبو: ،أنا كان قصدى ان التعامل مع ما هو تاريخى بالشكل "الحواديتى" اللى إنت كتبته، فيه كثير من التبسيط الذى ربما يكون مُخل ، علشان كده طلبت منك مراجعتها لتصبح أعمق وفيها قراءة للأحداث و ما ورائها والخلفيات الثقافية/الحضارية بما يناسب جلال التصدى لكتابة التاريخ ، و بما إنك دارس تاريخ زي إنت مابتقول أظن هتفهم اللى بقوله ، وبما إنى مش غاوى إننا نزايد على بعض و بما إنى مش أستاذك ولا أستاذ حد فأنا ماعنديش "تعديلات" و أظن إن دعوتك للمراجعة هتعيد إنعاش رؤيتك و معلوماتك إنت و اللى بيقرولك هما اللى هيستفيدوا منها و دى مسئوليتك بما إنك بتتصدى لما هو تاريخى و إنت دارس تاريخ ، أخيراً نظراً لأنى مش غاوى هذا النوع من الخلافات فأنا هاخرج من الموضوع ، و اعذرنى ماكنتش عارف إن روايات عبير أو الدعوة للمراجعة حاجة تزعل

ملحوظة :ولو إن قراءة روايات عبير- وهى روايات رومانسية إذا كنت مش عارف - مش تهمة لكن أنا كمان ماقريتهاش

Mr-Biboooo said...

على فكرة انا بشكرك لاهتمامك بجد لكن انا مش بتعرض للموضوع التاريخى انا بتكلم عن المرأة وواخد مثال لشخصية و لو تلاحظ انا مش بتكلم عن تاريخها انا بتكلم عن حاجة تانية و عموما يا سيدى متتقمصشى كده

انا قاصد اكتب بالشكل الحواديتى ده كنوع من الاستظراف

يا سيدى انا بحب استظرف

كركر اضحك و اسمع الاغنية

اظن انك انضج من كده و تعرف الفرق بين سرد التاريخ و استخدامه كخلفية رمزية

و على فكرة انا مش بس دارس تايخ فرعونى لا كمان اسلامى و اعجبك يعنى

Anonymous said...

انا عاوزه اقول كلمه واحده بس انى كنت قررت اقرى ولابسه السماعات عادى يعنى اول ماسمعت الاغنيه قفلت مزعجه فعلا

HERA said...

اخص عليكى يا انونيموسايه يا وحشه انتو كلكو عليه وللا ايه؟؟

Mr-Biboooo said...

حتشبسووووووووووت

قفلوا عليكى يا حلوة تابوت


سلامة ودانك يا انينموس


هيرا ربنا يخليكى ليا يا هرهورتى

أبوشنب said...

لمــــا بكيت حبيبتي
عالرابط ده
http://aboshanab.blogspot.com/

Anonymous said...

أنا بصراحة مكنتش فاضية، بس أعمل إيه شدني البوست. أحب أشكرك على المعلومات الغريبة دي و على القصة المؤثرة اللي إنت شايفها، دي بجد شهادة بثقتك في المرأة مهما حصل منها
و أحب أشكر "شوكس" على رأيه في أمرأة هذا القرن بس و خلينا أحنا أحسن منه
:)

خجل said...

ايوه فاضيه

Zeryab said...

مش شرط يعنى التاريخ يبقى حجارة وطوب..تحويله لبونبونى أمر ممتع أحيانا

Unknown said...

القصة حلوة
واللي بيفهم فعلا ف سيكولوجية المرأة هيقول فعلا انها ممكن تعمل كده
لكن اللى يشوف تماثيل حتشبسوت
المشوهة يقول ان سننموت اتغاظ منها وراماها ف بلاعة

littilemo said...

ممتاز

Mr-Biboooo said...

انا اسف انى مردتيش على التعليقات لكن هحاول اعمل اللى ربنا يقدرنى عليه امتحانات بقى

عموما لكل اللى علق فعلا القصة حلوة بس تتقرا على انها قصة


و اتمنى ان يكون اللى كتبته واضح عشان سوء التفاهم بس

المهم بس توضيح لجيرمينيو

تماثيل حتشبسوت من اجمل التماثيل فى العصر الفرعونى لكن تشويهها كان بسبب تحتمس الثالث لانه كان بيكرهها

مش ذنبه يعنى

Admin said...

اديييييييييييم يا بيبو...يا ابني من افضل ما قرأت في المدونات...استمر يا ابني و تبقي واد جامد مووت لو كتبته سيناريو و عملته فيلم...بس عشان خاطري ميكونش بطولة يسرا عشان زهقت...

Sala7ef said...

ايه يا عم المدونة الجامدة دي... و الله قريتها من اولها لأخرها... يبدو من قولك اني انا فاضي و يبدو كمان ان ارائك من النوع اللي هقولها في يوم من الايام و انسبها لنفسي :-)

Anonymous said...

really the story is so interested
i donot like to move my eyes from this story.i read it for several times.it is wonderful.Thank you MR Biboooo for these information that you produced in a very simple way that didnot make me boared.I want to tell you that my nephews who are 8 and 5 years old loked the story and asked me about more writing for you.Donot pay attention for those who envy you.God help you.

nanosh mankosh said...

أولا أنا برفض أنك تقول أن أحد الدوافع لقراءة البوست ده أن الواحد يكون فاضي, لأن القراءة في كل شئ جديد على الإنسان بتكون مفيدة جدا و أهم من كل شئ تاني و بصراحة مش جايبنا ورا غير الكلام اللي زي ده, خلاص الشباب مبقاش عارف يقرا ولا يعرف يعني إيه ثقافة, القراءة بالنسبة لهم بقت المذاكرة و بس وبمجرد ما تخلص السنة مش عايزين يشوفوا وش كتاب.
ثانيا: فعلا أنت عندك شوية معلومات تاريخية خطأ و ممكن تسبب أن الناس اللي ميعرفوش عن الحضارة المصرية كويس و مش متخصصين فيها ياخدوا فكرة غلط عنها و دي مشكلة تانية. ومن المعلومات دي:
1- مفيش اي دليل على أن حتشبسوت حبست تحتمس التالت في قبو موحش زي ما بتقول بالعكس, تحتمس التالت إتجوز نفرورع بنت حتشبسوت من تحتمس التاني
2- حتشبسوت مضحتش بأنوثتها بمزاجها من أجل العرش لما إتجوزت تحتمس التاني رغم أن صحته على أده زي ما بتقول( و ده شئ أنا بصراحة أشك فيه) لأن حتشبسوت إتجوزت تحتمس التاني لأنه أخوها الغير شقيق و التقاليد كانت بتحتم ده في العائلات الملكية علشان يحافظوا على الدم الملكي
3- حتشبسوت لما إتعاملت كراجل كان ده من مبدأ أنها تظهر قوتها في الحكم و بالبلدي كده تظهر للناس أنها زي الراجل و أحسن كمان.
4- حتشبسوت لما حكمت 20 سنة ماكنتش بتخدع الشعب ولا حاجة و الدليل على ده عهدها المليان بالإصلاحات و المشاريع الضخمة اللي كانت في صالح البلد ولو حضرتك فعلا دارس كويس في الحضارة المصرية كنت عرفت أن عهدها من أحسن العهود اللي مرت على مصر في الحضارة المصرية القديمة, يعني من الآخر كده ملعبتش بكل الأوراق من أجل المنصب زي ما بتقول لأنها مش محتاجة تعمل كده, لأنها لو ماكانتش إستولت على العرش فكفاية أنها إبنة ملك و زوجة ملك و أم زوجة الملك
5- حتشبسوت بعد عشرين سنة من الحكم ما إختفتش ولا حاجة دي ماتت بس في ظروف غامضة بس مش أكتر
6- في أواخر حكم حتشبسوت حصل تنكيل بسننموت, يعني بالبلدي كده حتشبسوت غضبت على سننموت لسبب مش معروف و ده شئ أجمع عليه معظم العلماء و المختصين بالحضارة المصرية القديمة

Anonymous said...

انا شايفة ان القصة مش دقيقة تاريخيا اوى ولكن من ناحية الاسلوب الحواديتى دة مش عيب خالص لان المفروض نستعمل اى طرق ممكنة تحول العلم والثقافة لمتعة لكن تعليقى الوحيد توخى الدقة التاريخية لان دى امانة وميرسى

Anonymous said...

انا شايف انك تاعب نفسك فى فهم حاجة هايفة ومتزعلش منى لانى صريح ايه يعنى لو فهمنا سيكولوجية المراءة هنعمل ايه يعنى حتى لو هنعمل حاجة هتكون حاجة تافهة بقولك ايه المرة الجاية حاول تفيدنا فى فهم سيكولوجية حلة الباميةاحسن

Anonymous said...

انت عارف انت بتتكلم فى ايه الاول انت بتتكلم فى سر اخطر من سر القنبلة الذرية واخطر من الكلام فى السياسة بل اخطر من سر مشكله الشرق الاوسط كله دة سر المراءة يا استاذ انا بنصحك انك تبقى ساكت احسن لحسن يحصلك اللى حصل للى قبليك واللى حاولوا يتكلموا فى الموضوع دة اللهم ما بلغت اللهم فاشهد

Anonymous said...

السلام عليكم
اولا بجد بحييك على البلوج الهايل دا
ثانيا المقالة جامدة جداا عرفت حاجات مكنت اعرفها عن المراة دى...انا مقتنعة جدا بالكلام لان نقطة الضعف المشتركة بين جميع النساء مهما اختلفت شخصياتهن هى القلب ....

ربنا يكرمك

Anonymous said...

TGM

Anonymous said...

القصة دى جامدة اوى ودى حاجة طبيعية لان الفراعنة دول اسياد الارض وانا من رايى ان حتشبسوت فعلا تركت الحكم عشان حبيبها بس انا شايفة ان مصلحة البلد اهم من الحبيب

Anonymous said...

بجد حاجه جميله انك تكتب او تحاول توصل معلومه بس الاجمل انك تكون متأكد من اللى بتكتبه لان للاسف فى غلطات تاريخيه جسيمه ارجو منك انك تتاكد قبل نشر اى شئ من اجل الشباب اللذين يعتمدون فى معرفتهم على مثل هذه الكتابات انا مهتمه جدا بالتاريخ وخصوصا الملكه حتشبسوت واكبر دليل على غلطاتك التاريخيه هو اعلان اكتشاف مومياء حتشبسوت مؤخرا كما اننى سألت بعض الاصدقاء متخصصين اساتذه فى جامعه القاهره كليه الاداب قسم تاريخ على مازكرته واكدوا لى على اخطاء جسيمه زكرتها يمكنك ان تكتب فى سيكولوجيه المراءه كما تريد لكن الاجتهاد فى الحقائق التاريخيه يتطلبه دراسات وقراءات طويله اشكشرك مره اخرى وارجو تحرى الدقه فى كتابات التاريخ

Anonymous said...

هاي بيبوووووو

اولا ميرسي كتيييير عالحكاية الجميلة والطريقة اللطيفة اللي انت حكتها بيها
ثانيا رغم حبي الشديد لشخصية حتشبسوت واللي رغم قوتها مقدرتش تقاوم حبها بس اختفائها بالشكل ده مايليق بملكة قدرت تخدع شعب باكمله بقوتها كانت تقدر تقلف لحبيبها ده رواية تخليه يقعد جنبها على عرش مصر دي حتي السيدات معروفة بالمكر وتقدر تقنع اي حد بافكارها
اعتقد ان اختفائها بالشكل ده كان اله اسباب تانية بجانب هالحب مين عارف
ميرسي تاني وياريت تبعتلي تعليقل عالميل ده لاني مش ملمة بالتارخ قوي ومعتقدتش اني ممكن افتكر ادخل عالسيت ده تاني
brainpower_2007@hotmail.com

خلود صلاح said...

امممم... حلو اوى على فكرة بجد جميل جدا
انا معرفش المدونة دى .. ودخلتها بالصدفة وانا بعمل سيرش ضرورى للكلية ... ومش فاضية كمان .. بس مش ينفغ الاقى حاجة عظيمة كدة ومش اعلق
ميرسى اوى وتحياتى ليك يا مسيو